.jpg)
Tədbirlərdə Ağstafa Rayon İcra Hakimiyyətinin başçısı Seymur Orucov, rayonun hüquq-mühafizə orqanlarının rəhbərləri, şəhid ailələrinin üzvləri, müharibə veteranları, rayon ərazisində yerləşən hərbi hissələrin əsgər və zabit heyəti, ictimaiyyət nümayəndələri iştirak ediblər.
"Unikal" xəbər verir ki, əvvəlcə ağstafalılar 8 Noyabr – Zəfər Gününün beşinci ildönümündə Ümummilli Lider Heydər Əliyevin abidəsini ziyarət edərək dahi rəhbərin əziz xatirəsini böyük hörmət və dərin ehtiramla yad ediblər. Sonra Ağstafa şəhərində Zəfər yürüşü keçirilib, Şəhidlər Memorial Abidə Kompleksində qəhrəman Vətən övladlarının əziz xatirəsi dərin ehtiramla anılıb.
Ağstafa rayon Heydər Əliyev Mərkəzində “Zəfər sədaları - Qəhrəmanlar unudulmur!” mövzusunda ümumrayon tədbiri keçirilib. Əvvəlcə Mərkəzin foyesində istedadlı yeniyetmə və gənclərin Zəfər Gününə həsr etdikləri əl işlərindən ibarət sərgilərə nəzər salınıb. Ümumrayon tədbiri Azərbaycan Respublikasının Dövlət Himninin səsləndirilməsi, Ümummilli Lider Heydər Əliyevin və Vətən uğrunda canını fəda edən qəhrəman şəhidlərimizin əziz xatirələrinin bir dəqiqəlik sükutla yad edilməsi ilə başlayıb.
Ümumrayon tədbirini giriş nitqi ilə açan RİH başçısı xalqımızın böyük coşqu və sevinclə qeyd etdiyi tarixi Zəfərin beşinci ildönümü münasibəti ilə hər kəsi təbrik edərək qeyd edib ki, Ulu Öndər Heydər Əliyev siyasi xəttini layiqincə davam etdirən Prezident, Müzəffər Ali Baş Komandan İlham Əliyevin qətiyyəti, zabit və əsgərlərimizin böyük şücaəti, xalqımızın möhtəşəm həmrəyliyi sayəsində Vətən müharibəsi məntiqi sonluqla, şanlı Zəfərlə başa çatdı. Dövlət başçımızın ən yaxın silahdaşı olan Birinci vitse-prezident Mehriban Əliyevanın Vətən, xalq və dövlət qarşısındakı misilsiz xidmətləri, xeyirxahlıq missiyası gələcək nəsillər üçün əsl vətənpərvərlik nümunəsidir.
Digər çıxış edən natiqlər, Yap Ağstafa rayon təşkilatının sədri Etibar Hacıyev, Tovuz Dövlət Peşə Təhsil Mərkəzinin direktoru Nicat Göyüşov, şəhid atası İlqar Quliyev, Vətən müharibəsi qazisi Fərid Əsgərov, ağstafalı gənc Aysu Quliyeva, rayon ziyalısı Məmməd Məmmədov mövzuya dair geniş məruzələrlə çıxış ediblər. Çıxışlarda 8 Noyabr – Zəfər gününün tarixi əhəmiyyətindən, eləcə də dövlətimizin şəhid ailələrinin üzvlərinə, müharibə iştirakçılarına göstərdiyi yüksək diqqət və qayğısından bəhs olunub.
Sonra Zəfər Gününün beşinci ildönümü münasibəti ilə ağstafalı yeniyetmə və gənclər arasında keçirilən Zəfər veloyürüşünün və təhsil işçiləri arasında keçirilən şahmat yarışının qalibləri Ağstafa Rayon İcra Hakimiyyətinin Fəxri Fərman və hədiyyələri ilə təltif olunublar.
Ümumrayon tədbirinin bədii hissəsində mədəniyyət nümayəndələrinin, eləcə də məktəblilərin təqdimatında nümayiş etdirilən geniş konsert proqramı böyük coşqu ilə qarşılanıb.
