...Sinqapur Baş Xəstəxanasının tədqiqatçıları xəbərdarlıq ediblər ki, tez-tez adi soyuqdəymə ilə səhv salınan respirator sinsitial virus (RSV) ciddi fəsadlara səbəb ola bilər və şiddətinə görə qrip və COVID-19 ilə müqayisə edilə bilər.
SİA-nın məlumatına görə, tədqiqat JAMA Network Open jurnalında dərc edilib.PREPARE (Epidemik Hazırlıq və Cavab Tədqiqatı Proqramı) proqramının alimləri RSV, qrip və COVID-19 səbəbindən on minlərlə xəstəxanaya yerləşdirilən şəxsin məlumatlarını təhlil ediblər.
Bütün hallarda RSV ilə xəstəliyin şiddəti digər virus infeksiyaları ilə müqayisə edilə bilən və ya daha çox olub.
...Soyuqdəymə simptomları olan xəstələrin təxminən 5-10 faizi əslində RSV ilə yoluxmuşdur. Bu virus qrip və ya koronavirusdan daha az yaygın olsa da, onun nəticələri də eyni dərəcədə ağır ola bilər, - deyə tədqiqatın aparıcı müəllifi, yoluxucu xəstəliklər üzrə mütəxəssis İan Vi qeyd edib.
Təxminən 13.000 xəstəxanaya yerləşdirilməni əhatə edən birinci tədqiqatda RSV xəstələrinin təxminən 5 faizi xəstəxanaya yerləşdirildikdən sonra 28 gün ərzində vəfat edib.
Bu xəstələrdə qrip xəstələri ilə müqayisədə ölüm və reanimasiyaya qəbul nisbəti daha yüksək olub.
Əvvəllər gücləndirici peyvənd almış xəstələrdə RSV-nin şiddəti COVID-19 ilə müqayisə edilə bilərdi.
İkinci tədqiqat göstərdi ki, RSV xəstələrindən hər on nəfərdən birində kəskin ürək-damar ağırlaşmaları - aritmiya, insult, tromboz və ya ürək çatışmazlığı inkişaf edib.
Bu nisbət COVID-19 və ya qrip ilə xəstəxanaya yerləşdirilənlərdən daha yüksək olub.
Üçüncü tədqiqat (təxminən 83.000 böyük və 24.000 uşaq) RSV-dən sağalan yetkinlərdə ürək-damar və nevroloji ağırlaşmalar riskinin xəstəlikdən 300 günə qədər davam etdiyini müəyyən edib.
RSV kiçik uşaqlar, yaşlılar və zəifləmiş immunitet sistemi olan xəstələr üçün ən böyük təhlükə yaradır. Bu xəstələrdə virusun pnevmoniya və tənəffüs çatışmazlığına səbəb olma ehtimalı daha yüksəkdir.
...Tədqiqatlarımız göstərir ki, həm uşaqlarda, həm də yaşlı xəstələrdə RSV ciddi qısamüddətli və uzunmüddətli ağırlaşmalara səbəb ola bilər. Yüksək risk qruplarındakı insanlar profilaktika barədə həkimləri ilə müzakirə etməlidirlər, - deyə Dr. Vi vurğulayıb.
Mütəxəssislər hər kəsə xatırladır ki, əl gigiyenasına riayət etməklə, xəstələndikdə yaxın təmasdan çəkinməklə və soyuqdəymə simptomları görünəndə maska taxmaqla özlərini RSV və digər tənəffüs viruslarından qoruya bilərlər.
Nazlı Almuradova
