Quba-Xaçmaz yolunun Quba rayonunun Alekseyevka kəndi ərazisindən keçən hissəsində ağır yol-nəqliyyat hadisəsi baş verib.

Reyting.az xəbər verir ki, hadisə barədə məlumatı APA yayıb. Bildirilir ki, toy karvanında hərəkətdə olan “VAZ-2107” markalı avtomobil yoldan çıxaraq ağaca çırpılıb.

Nəticədə avtomobilin sürücüsü, Xaçmaz rayon sakini, 23 yaşlı Mehdiyev Şahbala Asəf oğlu xəstəxanaya aparılarkən yolda dünyasını dəyişib.

TƏBİB-dən verilən məlumata görə, avtomobildə olan digər sərnişin - Süleymanov Ceyhun Zülfüqar oğlu Quba Rayon Mərkəzi Xəstəxanasının Təcili tibbi yardım şöbəsinə yerləşdirilib.

2002-ci il təvəllüdlü şəxsə bədənin müxtəlif nahiyələrində çoxsaylı əzilmə və sıyrıq yaraları, həmçinin qapalı kəllə-beyin travması diaqnozu qoyulub. Ona zəruri tibbi yardım göstərilib.

Faktla bağlı araşdırma aparılır.