İspaniyada artan quş qripi yoluxmaları səbəbindən son aylarda 2 milyondan çox ev quşu məhv edilib.
Quş qripinə qarşı xəbərdarlıq vəziyyətinə keçən ölkədə Kənd Təsərrüfatı, Balıqçılıq və Qida Nazirliyinin qərarı ilə riskli bölgə elan edilən 1199 bələdiyyədə bu gündən etibarən quşçuluq fermalarının fəaliyyəti dayandırılıb.
Nazirlik bildirib ki, quş qripi yoluxmalarının artması və miqrasiya edən quşların hərəkəti səbəbilə qoruyucu tədbirlər qüvvəyə minib. Yüksək riskli ərazilərdə ev quşlarının açıq havada yetişdirilməsi, heyvan toplama mərkəzlərində quş növlərinin saxlanılması kimi fəaliyyətlər qadağan edilib.
Xüsusilə yabanı quşlarla təmasın qarşısını almaq üçün nəzərdə tutulmuş quşçuluq təsərrüfatlarında ciddi biotəhlükəsizlik tədbirlərinin tətbiqi, nəzarətin gücləndirilməsi və şübhəli xəstəlik hallarının mümkün qədər tez bildirilməsi tələb olunub.
İspaniya Yumurta İstehsalçıları Birliyinin (Aseprhu) direktoru Mar Fernandes jurnalistlərə açıqlamasında bildirib ki, quş qripi böhranı yumurta sektoruna ciddi təsir göstərib.
İspaniya Quş Əti Peşələrarası Dərnəyinin (Avianza) baş katibi Jordi Monfort isə qeyd edib ki, sektor istehlakçılar, fermerlər, şirkətlər və dövlət qurumları qarşısında həmrəylik və məsuliyyətlə mövcud quş qripi böhranına cavab verir. Monfort bildirib ki, quş əti sektoru ən yüksək biotəhlükəsizlik və nəzarət tədbirləri ilə böhrandan nisbətən daha az təsirlənib.
