ain.az, Ses qazeti saytına istinadən bildirir.
Bakıdakı hərbi paradla bağlı dünya mətbuatında çoxsaylı məqalələr yayımlandı. Vestikavkaza.ru yazır ki, 44 günlük Vətən Müharibəsində Qələbənin 5-ci ildönümünə həsr olunmuş hərbi parad keçirilib: "Şənliklər Azadlıq Meydanında keçirilir. Paradda Azərbaycan Respublikasının Prezidenti İlham Əliyev, birinci xanım Mehriban Əliyeva, Türkiyə Respublikasının Prezidenti Rəcəb Tayyib Ərdoğan və Pakistanın Baş naziri Məhəmməd Şahbaz Şərif iştirak edirlər".
Sayt yazır: "Paradda çıxış edən Azərbaycan Prezidenti İlham Əliyev həmin müharibənin tarixindən və müharibədən sonrakı işğaldan azad edilmiş ərazilərin dirçəlişindən danışıb.
O, xatırladıb ki, 1990-cı illərin əvvəllərində Ermənistan Azərbaycan ərazisinin 20%-ni işğal edib; təxminən bir milyon azərbaycanlı qaçqın və məcburi köçkün vəziyyətinə düşüb. Onlara qarşı müharibə cinayətləri, Xocalı soyqırımı və etnik təmizləmə siyasəti törədilib. Sülh danışıqları apararkən eyni zamanda bəyan etdik ki, əgər onlar uğursuz olarsa, Azərbaycan tarixi, əzəli torpaqlarını hərbi yol da daxil olmaqla, istənilən vasitə ilə azad edəcək.
Bu uzun sürən danışıqların nəticəsi sıfır oldu, çünki Ermənistanın Azərbaycan torpaqlarını könüllü olaraq azad etmək niyyəti yox idi. Lakin Bakı ölkənin ərazi bütövlüyünün və suverenliyinin tam bərpasında israr etdi".
Məqalədə daha sonra deyilir: "Biz gücümüzü artırdıq və hər il daha da gücləndik. Beynəlxalq arenada səsimizi ucalda bildik. Bütün beynəlxalq təşkilatlarda ölkəmizin bu münaqişə ilə bağlı mövqeyi üstünlük təşkil etdi. Bir çox qərar və qətnamələr qələbəmizin hüquqi və siyasi əsasını təşkil etdi. Eyni zamanda, ölkə güclü iqtisadiyyat qurmağı bacardı, mahiyyət etibarilə iqtisadi müstəqillik qazandı ki, bu da Azərbaycana siyasi güc verdi. Enerji və nəqliyyat layihələrini uğurla həyata keçirməklə Azərbaycan bir çox ölkələr üçün əvəzolunmaz hala gəldi. Eyni zamanda, ordu quruculuğu Bakı üçün prioritet olaraq qaldı. Biz güclü bir ordu, güclü silahlı qüvvələr yaratdıq. Ordumuzun döyüş hazırlığını artırdıq, onu ən müasir silah və avadanlıqlarla təchiz etdik. Bütün bunlar və daha çox şey şanlı Qələbəyə töhfə verdi".
Məqalədə Prezident İlham əliyevin paraddakı çıxışı geniş şərh edilib: "İkinci Qarabağ müharibəsi ərəfəsində yaranan vəziyyətlə bağlı Azərbaycan Prezidenti bildirib ki, Ermənistan daha sonra yeni ərazi iddiaları irəli sürərək yeni müharibə ilə hədə-qorxu gəlməyə başlayıb: "Hətta yeni torpaqlar uğrunda yeni müharibə başladacaqlarını və Azərbaycanı tamamilə işğal edəcəklərini bildiriblər. Tanklarının Bakı küçələrində olacağını deyiblər. Deyiblər ki, Bakıda çay içəcəklər. Əslində, onların arzuları gerçəkləşib. Biz onları gerçəkləşdirdik. Tankları indi Müharibə Qələbəsi Parkında nümayiş etdirilir. Erməni müharibə cinayətkarları bu gün Bakıda məhkəmə qarşısına çıxarılıb və istintaq təcridxanasında Azərbaycan çayı içirlər".
Məqalə belə yekunlaşır: "44 günlük müharibə zamanı Azərbaycan Silahlı Qüvvələri 300-dən çox şəhər və kəndi azad edib. 8 noyabrda alınmaz qala hesab edilən Şuşa şəhəri azad edilib. Bir gün sonra - 9-10 noyabr gecəsi İlham Əliyev, Ermənistanın Baş naziri Nikol Paşinyan və Rusiya Prezidenti Vladimir Putin üçtərəfli atəşkəs bəyannaməsi imzalayıblar. Ermənistan rəsmi olaraq təslim olub və Təslim Aktını imzalayıblar. İlham əliyev belə deyir: "Beləliklə, biz özümüz ərazi bütövlüyümüzü, tarixi ədaləti, beynəlxalq hüququ və milli ləyaqətimizi bərpa etdik. Bu gün Qarabağ və Şərqi Zəngəzur dirçəlir və "Böyük Qayıdış" proqramı həyata keçirilir: məktəblər, xəstəxanalar, sənaye müəssisələri, elektrik stansiyaları, su anbarları və evlər tikilir. Artıq təxminən 60.000 insan azad edilmiş torpaqlarda yaşayır, işləyir və təhsil alır. Bu beş ili qürur hissi ilə yaşadıq... Biz, bu torpaqların sahibləri, Qarabağa, Şərqi Zəngəzura qayıtdıq və bundan sonra bu torpaqlarda əbədi yaşayacağıq. Azərbaycan bayrağı bu torpaqlarda həmişə dalğalanacaq".
Məqalənin linki:
https://vestikavkaza.ru/articles/ilham-aliev-my-vernulis-v-karabah-vostocnyj-zangezur-i-otnyne-budem-zit-na-etih-zemlah-vecno.html
Lalə Mehralı
Daha ətraflı məlumat və yeniliklər üçün ain.az saytını izləyin.
