Azərbaycan hərbi parad keçirməklə dünyaya ok gücünü göstərdi
Azərbaycan Ordusunun növbəti möhtəşəm hərbi paradı ölkəmizin hərbi qüdrətinin, milli birliyinin və müasir dövlətçilik ideologiyasının parlaq təzahürü kimi tarixə yazıldı. Paytaxt Bakının mərkəzində keçirilən bu təntənəli tədbir, həm daxildə xalqın qürur mənbəyi, həm də beynəlxalq arenada Azərbaycanın artan hərbi-siyasi nüfuzunun nümayişi oldu.
Paradda Azərbaycan Silahlı Qüvvələrinin müxtəlif qoşun növləri, o cümlədən quru qoşunları, hava hücumundan müdafiə sistemləri, raket-artilleriya hissələri, xüsusi təyinatlı qüvvələr və hərbi aviasiya bölmələri iştirak etdi. Meydandan keçən müasir texnika nümunələri – “Polonez”, “İskəndər-E”, “Harop” tipli pilotsuz uçuş aparatları, zirehli maşınlar və yüksək dəqiqlikli silah sistemləri – eAzərbaycanın müdafiə sənayesinin və ordu quruculuğundakı böyük irəliləyişin bariz göstəricisi idi.
Bu parad yalnız hərbi güc nümayişi deyil, həm də bu barədə Azərbaycanın sülh və təhlükəsizliyə verdiyi önəmin ifadəsi kimi qiymətləndirilməlidir. Ölkə rəhbərliyinin dəfələrlə vurğuladığı kimi, Azərbaycanın məqsədi regionda sabitliyin və ədalətin qorunması, milli maraqların təmin edilməsi və xalqın rifahının yüksəldilməsidir.
Müzəffər Ali Baş Komandan İlham Əliyev paradda çıxış edərək qeyd etdi ki, bu gün Azərbaycan Ordusu təkcə regionun deyil, dünyanın ən güclü orduları sırasında yer alır. O, həmçinin 44 günlük Vətən müharibəsində qazanılan tarixi Qələbəni xatırladaraq bildirdi ki, həmin Zəfər Azərbaycanın hərbi, siyasi və mənəvi qüdrətinin birliyindən doğmuşdur.
Tədbir, həmçinin beynəlxalq müşahidəçilər və dost ölkələrin nümayəndələri tərəfindən də yüksək qiymətləndirildi. Parad bir daha sübut etdi ki, Azərbaycan müstəqil, güclü və öz yolunu müəyyən etmiş dövlətdir.
Azərbaycan bu gün təkcə neft-qaz potensialı ilə deyil, həm də müasir ordusu, milli iradəsi və strateji düşüncəsi ilə regionun lider dövlətinə çevrilib. Bakıda keçirilən bu hərbi parad həm xalqımızın qürur mənbəyidir, həm də dünyaya verilən açıq mesajdır: Azərbaycan güclüdür, Azərbaycan qalib dövlətdir, Azərbaycanla hesablaşmaq lazımdır.
Rəşad BAXŞƏLİYEV,
"Azərbaycan"
