“Oğlum mənə dedi ki, “ata, sən çayı sevirsən, sənə Azərbaycan çayı almışam...”
Redaktor.az xəbər verir ki, bu sözləri Gürcüstan-Azərbaycan sərhədində qəzaya uğrayan hərbi yük təyyarəsində şəhid olan 27 yaşlı hərbçi Berkay Karacanın atası Nedim Karaca bildirib.
O, qəza baş verən gündən bir gün əvvəl oğluyla telefonla danışdığını deyib: “Danışanda bizə Azərbaycandan hədiyyə aldığını demişdi. Dedi ki, bir qrup getdi, ondan sonra biz gələcəyik. Amma gələ bilmədi...”
Özünün də təqaüddə olan hərbçi olduğunu deyən N.Karaca oğlunun uşaqlıqdan hərbçi olmaq arzusunda olduğunu deyib: “Övladım öz işini çox sevirdi. 8 ildir xidmət edirdi. Bu il yer dəyişikliyi edəcəkdi. Deyirdi ki, “ata, təyinat istəyəcəyəm, sənə yaxın Bandırmaya gələcəyəm”. Amma gələ bilmədi. Oğlumun toyu etmək əvəzinə cənazə hazırlıqlarını edirəm.
Oğlum anasına “ana, mən şəhid olacağam, sən də Vətən sağ olsun deyəcəksən, mətanətli duracaqsan, dik duracaqsan” deyib. Vətən sağ olsun!”
Xatırladaq ki, noyabrın 11-də Azərbaycan-Gürcüstan sərhədində Türkiyə Silahlı Qüvvələrinə məxsus “C-130” tipli təyyarənin qəzaya uğraması nəticəsində 20 hərbçi həlak olmuşdu.
