ain.az bildirir, Azertag saytına əsaslanaraq.
Bakı, 18 noyabr, Günel Alıyeva, AZƏRTAC
Hazırda Bakıda keçirilən və görkəmli yazıçı, dramaturq və ssenarist Maqsud İbrahimbəyovun 90 illik yubileyinə həsr olunmuş “Neft bumu hamıya gülümsəyir” festivalı çərçivəsində şəhərin müxtəlif səhnələrində ədəbi əsərlərin qiraətləri, rəsm sərgiləri və tamaşaların nümayişi planlaşdırılır. Bu, Maqsud İbrahimbəyovun yaradıcılığını yenidən kəşf etmək, onu yeni nəslə tanıtmaq üçün bir fürsətdir. Yaşlı nəsil yazıçının əsərlərini yaxşı xatırlayır, çünki bir çoxları onun qısa hekayələri və povestləri ilə böyüyüb.
Bu barədə festival iştirakçısı, dramaturq və teatr kuratoru İsmayıl İman AZƏRTAC-a müsahibəsində deyib.
Onun sözlərinə görə, festival gənclərin Xalq yazıçısının yaradıcılığına marağını qorumaqla yanaşı, həm də gənc müəllifləri onun mətnləri əsasında əhvali-ruhiyyə və mövzu baxımından oxşar müstəqil əsərlər yaratmağa ruhlandırır. Dramaturq xüsusi olaraq festival üçün ilk neft bumu haqqında yeni bir pyes hazırlayır: hadisələr 1915-ci ildə baş verir, tamaşanın premyerası isə Maqsud İbrahimbəyov Yaradıcılıq Mərkəzində keçiriləcək.
İ.İman qeyd edib ki, gənc rejissorların, rəssamların və ədəbişünasların öz ideyalarını və ambisiyalarını həyata keçirə biləcəyi yaradıcı məkanlara açıq şəkildə ehtiyac var. Görkəmli yazıçının bu yaradıcılıq mərkəzi məhz belə bir məkandır.
“Klassikin zəngin ədəbi irsinin qorunması ilə yanaşı, mərkəz yeni əsərlərin yarandığı, müasir interpretasiyaların baş qaldırdığı və nəsillər arasında dialoqun formalaşdığı bir platformadır. Burada həm gənc müəlliflərin orijinal əsərləri, həm də yazıçının mətnlərinə əsaslanan əsərlərə rast gəlmək olar”, - deyə o əlavə edib.
Dramaturqun sözlərinə görə, Maqsud İbrahimbəyovun yaradıcılığı Azərbaycandan kənarda da geniş tanınırdı. “Bu gün belə festivallar bu marağı qoruyub saxlamağa və genişləndirməyə kömək edir, Azərbaycan mədəniyyətinin, o cümlədən beynəlxalq səhnədə təşviqi üçün yeni imkanlar açır”, - deyə İ.İman sözünü yekunlaşdırıb.
Daha ətraflı məlumat və yeniliklər üçün ain.az saytını izləyin.
