Livanda ordu ölkənin ən böyük narkotik qaçaqmalçısı kimi tanınan Nuh Zayterin həbs olunması ilə nəticələnən əməliyyat keçirib.
"Ölkə.az" xəbər verir ki, bu barədə Livanın "Əl-Cədid" televiziya kanalı məlumat verib.
"Nuh Zayter xüsusi əməliyyat nəticəsində Livan ordusu tərəfindən Baalbekdə saxlanılıb", - kanal bildirib.
Nuh Zayter ölkənin ən təhlükəli və nüfuzlu cinayətkarlarından biri kimi tanınır. O, Livanın şərqində yerləşən Bekaa vadisində qanunsuz narkotiklərin istehsalı və ticarəti ilə məşğul olan böyük bir şəbəkəyə rəhbərlik edir. Zayter uzun müddət silahlı qruplar üzərində nəzarəti və bölgədəki təsiri sayəsində həbsdən uğurla yayınıb.
Bəzi media orqanları onun fəaliyyətinin müxtəlif siyasi qüvvələrlə əlaqəli olduğunu iddia ediblər. Livan hərbi məhkəməsi əvvəllər Zayteri narkotik və silah qaçaqmalçılığına, eləcə də silahlı münaqişələrdə iştirakına görə qiyabi olaraq ömürlük həbs cəzasına məhkum etmişdi.
Elvin
Ölkə.az
