BAKI, 21 noyabr. TELEQRAF
Ukrayna Prezidenti Volodimir Zelenski ABŞ Prezidenti Donald Trampın sülh planına dəyişiklik etmək niyyətində olduğunu bildirib.
Teleqraf xəbər verir ki, Volodimir Zelenski bunun ukraynalıların “şərəf və ləyaqətinin” sənəddə əksini tapması üçün vacib olduğunu deyib.
Onun sözlərinə görə, hazırda ölkə tarixinin ən çətin dövrlərindən birini yaşayır.
“İndi Ukrayna çox ağır seçim qarşısında qala bilər, ya ləyaqətin itirilməsi, ya da əsas tərəfdaşın itirilməsi riski. Ya bu çətin 28 bənd, ya da son dərəcə ağır qış, indiyədək ən ağır olanı və gələcək risklər”,- deyə Zelenski bildirib.
Ukrayna Prezidenti vurğulayıb ki, azadlıq, ləyaqət və ədalət olmadan həyat ukraynalılar üçün qəbuledilməzdir. Buna görə də o, milli maraqları müdafiə edəcəyini və tərəfdaşlarla konstruktiv həll yolları axtaracağını qeyd edib.
“Bizi qane etməyən məqamlarla bağlı konstruktiv variantlar təklif edəcəyik. Rusiyaya "Ukrayna sülh istəmir" deməyə imkan verməyəcəyik”,- deyə Zelenski əlavə edib.
