Rusiyanın "Neiry" şirkəti monitorinq və axtarış-xilasetmə əməliyyatları üçün hazırlanmış PJN-1 biodron göyərçinlərini təqdim edib.
"Unikal" xəbər verir ki, bu barədə şirkətin veb saytında məlumat verilib.
Şirkət qeyd edib ki, biodronu olan göyərçinlər beyninə neyron interfeysləri implantasiya edilmiş quşlardır. Bu texnologiyadan istifadə edərək operatorlar onları pilotsuz uçuş aparatları (PUA) kimi idarə edə bilərlər.
Biodronla təlim keçmiş heyvan arasındakı mühüm fərq təlim tələb olunmamasıdır: əməliyyatdan sonra istənilən heyvan uzaqdan idarə oluna bilər. Beyinin müəyyən sahələrinin neyrostimulyasiyası vasitəsilə quş istənilən istiqamətdə hərəkət etməyi "arzulayır".
"Neiry" əlavə edib ki, alimlər və tərtibatçılar hazırda bu göyərçinlərin uçuş xüsusiyyətlərini sınaqdan keçirirlər. Gələcəkdə şirkət qarğa, qağayı və albatrosdan istifadə etməyi planlaşdırır.
