Counterpoint Research-in Çərşənbə günü yayımladığı hesabata görə, Apple 2025-ci ildə 14 ildən sonra ilk dəfə Samsung-dan daha çox smartfon göndərişi etməyə hazırlaşır.
Marja hesabata istinadən xəbər verir ki, Apple bu il təxminən 243 milyon iPhone göndərişi həyata keçirəcək, Samsung-un göndərişləri isə təxminən 235 milyon olacaq. Bununla da Apple-ın qlobal smartfon bazarındakı payı 19,4%, Samsung-un payı isə 18,7% səviyyəsində qalacaq.
Göndərişlər istehsalçıların pərakəndə satış kanallarına göndərdiyi cihaz sayını ifadə edir və birbaşa satış demək deyil. Lakin bu göstərici istehsalçıların satış gözləntiləri və bazar tələbi barədə mühüm siqnal sayılır.
Counterpoint-ə görə, Apple-ın uğurunun əsas səbəbi sentyabr ayında satışa çıxarılan iPhone 17 seriyasıdır.
Tədqiqat şirkəti bildirir ki, ABŞ-da iPhone Air daxil olmaqla iPhone 17 seriyasının satışları, satışa çıxarıldıqdan sonrakı ilk dörd həftədə iPhone 16 seriyası ilə müqayisədə (iPhone 16e istisna olmaqla) 12% daha yüksək olub. Apple üçün mühüm əhəmiyyət daşıyan Çin bazarında isə eyni dövrdə iPhone 17 satışları əvvəlki modelə nisbətən 18% daha yüksək nəticə göstərib.
