Özbəkistanın Daşkənd şəhərində “Quacquarelli Symonds” (QS) qlobal reytinq agentliyinin təşkilatçılığı və Mərkəzi Asiya Universitetinin ev sahibliyi ilə QS Avrasiya Forumu keçirilib. Azərbaycan Dövlət Neft və Sənaye Universiteti (ADNSU) rektor, dosent Rüfət Əzizovun rəhbərlik etdiyi nümayəndə heyəti ilə Forumda təmsil olunub.
Bu barədə TƏHSİL.BİZ-ə ADNSU-dan məlumat verilib.
Forum çərçivəsində ADNSU ilə Mərkəzi Asiya Universiteti arasında akademik və elmi əməkdaşlığın genişləndirilməsinə yönəlmiş anlaşma memorandumu imzalanıb.
Sənədə əsasən, tərəflər professor-müəllim heyəti və tələbə mübadiləsi, birgə tədqiqat və təhsil layihələrinin hazırlanması və icrası, elmi nəticələrin birgə nəşri, konfranslarda iştirak, həmçinin akademik materialların mübadiləsi kimi istiqamətlərdə əməkdaşlıq edəcəklər.
Memorandumda hər bir layihə üçün büdcə və icra mexanizmlərinin ayrıca razılaşdırılması, əqli mülkiyyət hüquqlarının qorunması və tərəflərin fəaliyyətlərini əlaqələndirəcək məsul şəxslərin təyin edilməsi nəzərdə tutulub və birgə görüləcək işlərlə bağlı konkret hədəflər müəyyən olunub.
