Son aylarda ərzaq məhsullarının qiymətində nəzərəçarpacaq dərəcədə artım müşahidə olunur. Bu vəziyyət həm ailə büdcələrinə, həm də ümumi istehlak vərdişlərinə təsir göstərir. Qiymət artımının səbəbləri əsasən bazardakı təchizat problemləri, inflyasiya və daşınma xərclərinin yüksəlməsi ilə əlaqələndirilir. Nəticədə əhali gündəlik tələbat mallarını əvvəlki kimi rahat şəkildə əldə etməkdə çətinlik çəkir. Bəs görəsən bu artım 2026-cı ildə də davam edəcəkmi? Hansı məhsulların qiymətinin artımı gözlənilir?
Mövzu ilə bağlı Missiya.Az-a danışan iqtisadçı ekspert Akif Nəsirli bildirib ki, son aylarda Azərbaycanda ərzaq məhsullarının qiymətlərində nəzərəçarpan artmasının başlıca səbəbləri həm daxili iqtisadi amillər, həm də qlobal bazarlardakı dəyişikliklərdir:
"Ölkədə ümumi inflyasiya səviyyəsinin yüksəlməsi ərzaq qrupunda qiymət artımını daha da sürətləndirir. İstehsalçıların xərclərinin – yanacaq, gübrə, logistika və digər dövriyyə xərclərinin artması bazara çıxan məhsulların qiymətinə birbaşa təsir edir. Bununla yanaşı, iqlim dəyişiklikləri, quraqlıq, məhsuldarlığın aşağı düşməsi kimi təbii faktorlar ərzaq təklifini məhdudlaşdırır və qiymət artımını qaçılmaz edir.Qlobal ərzaq bazarında da son aylarda vəziyyət sabit deyil. Bitki yağları, ət məhsulları və bir sıra kənd təsərrüfatı mallarında dünya üzrə qiymət artımı müşahidə olunur ki, bu da idxaldan asılı olan ölkələrdə daxili bahalaşmanı gücləndirir. Beynəlxalq tədarük zəncirlərində gecikmələr, logistika xərclərinin bahalaşması və geosiyasi gərginliklər də ümumi qiymət təzyiqini artırır"- deyə ekspert bildirib.
Onun sözlərinə görə, 2026-cı illə bağlı proqnozlar göstərir ki, bahalaşmanın tam dayanması gözlənilmir:
"Bazarda kəskin sıçrayış ehtimalı az olsa da, müəyyən məhsullarda artım tendensiyası davam edə bilər. Xüsusilə bitki yağları, ət və ət məhsulları, süd və süd məhsulları, həmçinin meyvə-tərəvəz bazarında qiymətlərinin yenə yüksəlməsi mümkündür. Bu məhsullar həm qlobal qiymət dəyişikliklərinə daha həssasdır, həm də istehsal xərclərinin artımına tez reaksiya verir. Taxıl və çörək məhsulları bazarında nisbətən sabitlik mümkündür, çünki dünya taxıl bazarında kəskin çatışmazlıq gözlənilmir.Ümumi mənzərə göstərir ki, ərzaq qiymətlərinin artımı həm xarici, həm daxili amillərin təsiri ilə formalaşır və yaxın bir ildə də davam edə bilər. Buna görə də həm istehsal, həm idxal, həm də qiymət tənzimləməsi sahəsində yeni addımlar olmasa, bazar qiymətlərində ciddi ucuzlaşma ehtimalı azdır", - deyə Akif Nəsirli əlavə edib.
Seyranə QuliyevaMissiya.Az
