BAKI, 30 noyabr. TELEQRAF
40 yaşdan sonra klassik plastik cərrahiyyə metodları gözlənilən nəticəni verməyə və üzü vizual olaraq daha yaşlı göstərməyə başlaya bilər.
Teleqraf "Gazeta.ru"ya istinadən xəbər verir ki, bunu rinocərrah, plastik cərrah Sergey Karpoviç deyib.
Onun sözlərinə görə, gənc üz elastikliyi yüksək olan “bərk döşəyə” bənzəyir, yaş artdıqca isə toxumalar boşalır və yalnız dərinin dartılması ilə aparılan köhnə texnikalar həm qısaömürlü, həm də qeyri-təbii nəticə yaradır.
Karpoviç bildirib ki, yaşlanma zamanı kollagen və elastin istehsalı azalır, mikrosirkulyasiya zəifləyir, yağ toxumasının paylanması və üz skeleti dəyişir. Bu səbəbdən sadəcə dərinin gərilməsi “maska effekti” yaradır və mimikanı məhdudlaşdırır.
Mütəxəssis 40 yaşdan yuxarı pasiyentlər üçün SMAS və əzələ karkasının işlənməsinə əsaslanan dərin lifting texnikalarını tövsiyə edir. O, həmçinin blefaroplastika zamanı yağ toxumasının daha dəqiq paylanmasını, liposaksiya zamanı isə kollageni stimullaşdıran lazer və radiofrekans texnologiyalarının istifadəsini məsləhət görür.
Karpoviçin sözlərinə görə, bu yaş dövründə rinoplastika da rekonstruktiv yanaşma tələb edir: dəstək strukturlarının gücləndirilməsi və qığırdaq transplantatlarından istifadə vacibdir. O əlavə edib ki, yaş plastik əməliyyata maneə deyil, lakin müdaxilə fərdi şəkildə planlaşdırılmalı və təcrübəli cərrah tərəfindən icra olunmalıdır.
Həkim əlavə edib ki, 40 yaşdan sonra əməliyyatlar rekonstruktiv yanaşma, bir neçə sahənin birlikdə korreksiyası və həcmin dolğular və ya öz piy toxuması ilə bərpasını tələb edir.
O, həmçinin daha yumşaq və təhlükəsiz texnologiyaların seçilməsini vacib sayır.
Karpoviç bildirib ki, əsas səhv 25 yaş üçün uyğun olan standart əməliyyatı seçməkdir. Onun sözlərinə görə, 40 yaşdan sonra əməliyyat planı yalnız fərdi diaqnostika və toxumaların müdaxiləyə reaksiyasına əsaslanmalıdır.
