Sherg.az portalından verilən məlumata əsasən, ain.az bildirir.
Dünyanın ilk insan yuma kapsulu satışa çıxarıldı
Yalnız 15 dəqiqədə yuma, qurulama və sağlamlıq nəzarəti aparan kapsul texnologiya dünyasını təəccübləndirib, qiyməti isə böyük rezonans yaradıb.
Sherg.az xəbər verir ki, Yaponiya illərdir müzakirə olunan avtomatik insan yuma maşınını rəsmi olaraq bazara təqdim edib. Science Inc. tərəfindən hazırlanan bu cihaz, içəri daxil olan şəxsi cəmi 15 dəqiqə ərzində yuyan, qurudan və sağlamlıq göstəricilərini izləyən yüksək texnologiyalı spa kapsulu kimi satışa çıxarılıb. İlk dəfə bu il Osakadakı dünya sərgisində nümayiş etdirilən kapsul artıq yapon istehlakçıları tərəfindən satın alına bilir.
Sistem belə işləyir: istifadəçi kapsula daxil olub rahat kresloda uzanır, qapaq bağlanır və proses avtomatik başlayır. Maşın bədəni məsamələrə qədər təmizləyən mikroköpük texnologiyasından istifadə edir. Ardınca qurulama mərhələləri də avtomatik həyata keçirilir. Proses boyu rahatladıcı musiqi səslənir.
Science Inc. sözçüsü Saçiko Maekura cihazın yalnız bədəni deyil, “ruhu da yuduğunu” bildirərək, kapsuldakı sensorların istifadəçinin ürək döyüntüsü kimi həyati göstəricilərini izlədiyini qeyd edib.
İnsan yuma maşını konsepti əslində yeni deyil. İlk dəfə “1970 Osaka Ekspo” sərgisində Sanyo Electric tərəfindən təqdim edilib. Science Inc. prezidenti Yasuaki Aoyama uşaqlıqda bu maşını gördüyünü, illər sonra həmin ideyanı müasir texnologiya ilə yenidən həyata keçirdiyini deyib. “2025 Osaka Ekspo”-da böyük maraq gördükdən sonra şirkət cihazın kommersiya istehsalına qərar verib.
Kapsulun ölçüləri təxminən belədir: 2,5 metr uzunluq, 1 metr en, 2,6 metr hündürlük. Yəni böyüklərin rahat uzana biləcəyi qədər genişdir.
Təmizlikdə istifadə edilən mikroköpük texnologiyası artıq Yaponiyanın lüks spa və hamam mərkəzlərində tətbiq olunan yüksək standartlı bir sistemdir. Çirk, yağ və ölü dərini məsamələrə qədər təmizləyə bilir. 15 dəqiqəlik proses ərzində istifadəçinin bir barmağını belə tərpətməsinə ehtiyac qalmır.
Kapsulun satış qiyməti 60 milyon yen (təxminən 457 min dollar). Bu səbəbdən cihaz daha çox yüksək gəlirli spa mərkəzləri, otellər, istirahət kompleksləri və əyləncə parkları üçün nəzərdə tutulub.
Şirkət cəmi 40-50 ədəd istehsal etməyi planlaşdırır. İlk kapsulun bir yapon oteli tərəfindən alındığı, 5-8 potensial müştərinin də növbəyə yazıldığı açıqlanıb.
Mütəxəssislərə görə bu cihaz yalnız lüks spa məhsulu deyil. Yaponiyanın yaşlanan əhali üçün hazırladığı avtomatik baxım sistemlərinin vacib bir prototipi hesab olunur. Yuyan, qurudan və sağlamlıq nəzarəti aparan bu tip cihazların gələcəkdə yaşlı baxım müəssisələrində standart halına gələcəyi gözlənilir.
Hadisənin gedişatını izləmək üçün ain.az saytında ən son yeniliklərə baxın.
