Bakı, 5 dekabr, AZƏRTAC
İslam Əməkdaşlıq Təşkilatı (İƏT) olaraq Azərbaycan Respublikasının həmrəyliyə, əməkdaşlığa və mədəni mübadiləyə dəstək verən fəaliyyətini yüksək qiymətləndiririk. Azərbaycan bütün İƏT üzv dövlətləri tərəfindən böyük rəğbətlə qarşılanan təşəbbüslərə daim fəal şəkildə qoşulur. "İƏT Mədəniyyət Festivalı: Bakı Yaradıcı Həftə – 2025" ölkənin həmin öhdəliyinin, mədəni birliyinin və yaradıcılığın təşviqi üzrə səylərinin bariz göstəricisidir.
AZƏRTAC xəbər verir ki, bunu İslam Əməkdaşlıq Təşkilatının Humanitar, Mədəni, Sosial və Ailə İşləri Baş katibinin köməkçisi Tariq Ali Bakheet Bakıda keçiriləcək “İƏT Mədəniyyət Festivalı: Bakı Yaradıcı Həftə – 2025”ə həsr olunmuş mətbuat konfransında deyib.
O, bu festivalın mədəni əməkdaşlığı təşviq etmək, mədəni əlaqələri möhkəmləndirmək və yaradıcı təşəbbüsləri dəstəkləmək üçün mühüm platforma rolunu oynadığını deyib: "Biz müxtəlif ölkələrdən alimləri, musiqiçiləri, sənətkarları və yaradıcı sahə nümayəndələrini bir araya gətirərək onların ənənələrini, irslərini və təcrübələrini paylaşmaları üçün zəngin mühit yaradırıq".
