Ukrayna lideri stansiyanın birgə idarə olunmasını təhlükəsizlik zəmanəti kimi təqdim edir...
Poliqon xəbər verir ki, Ukrayna prezidenti Vladimir Zelenski Zaporojye Atom Elektrik Stansiyasının Ukrayna və ABŞ-nin birgə nəzarəti altına verilməsində israr edir. The Wall Street Journal qəzetinin məlumatına görə, Kiyev bu məsələni davam edən diplomatik müzakirələrin əsas elementlərindən biri kimi gündəmə gətirir.
Nəşr yazır ki, Zelenskiyə görə, Zaporojye AES-in taleyi təkcə Ukraynanın enerji təhlükəsizliyi deyil, eyni zamanda regional və beynəlxalq təhlükəsizlik baxımından da həlledici əhəmiyyət daşıyır. Ukrayna tərəfi hesab edir ki, ABŞ-nin prosesə birbaşa cəlb olunması stansiyanın hərbiləşdirilməsinin qarşısını ala və onun təhlükəsiz fəaliyyətinə real zəmanət verə bilər.
WSJ-nin qeyd etdiyinə görə, bu yanaşma Ukraynanın müharibənin nizamlanması ilə bağlı daha geniş mövqeyinin tərkib hissəsidir. Kiyev Zaporojye AES ətrafında hərbi risklərin davam etməsinin Avropa üçün ciddi ekoloji və humanitar təhlükə yaratdığını vurğulayır və stansiyanın beynəlxalq nəzarət mexanizmi ilə qorunmasını vacib sayır.
Xatırladaq ki, Zaporojye AES Avropanın ən böyük atom elektrik stansiyasıdır və müharibənin ilk aylarından etibarən beynəlxalq təşkilatların diqqət mərkəzindədir. Stansiya ətrafında vaxtaşırı atışmalar və təhlükəsizliklə bağlı xəbərlər yayılır, bu da mümkün nüvə qəzası riskləri ilə bağlı narahatlıqları artırır.
Poliqon.info
