ain.az, Bizimyol portalına istinadən məlumat yayır.
Azərbaycanın paytaxtı Bakı şəhərində, Azərbaycan-Şimali Kipr Türk Cümhuriyyəti (ŞKTC) münasibətləri mövzusunda rəsm sərgisi təşkil olunub.
Bizimyol.info xəbər verir ki, Azərbaycan Rəssamlar İttifaqında, ŞKTC Bakı Nümayəndəliyi və Yeni Azərbaycan Partiyası (YAP) Yasamal Rayon Təşkilatının birgə təşkilatçılığı ilə keçirilən "Qardaşlığımız əbədidir" adlı sərgidə, müxtəlif yaş qruplarından olan rəssamların Azərbaycan və ŞKTC-yə ithaf etdikləri əsərlər sənətsevərlərin diqqətinə təqdim olunub.
ŞKTC-nin Azərbaycandakı Səfiri Ufuk Turganer tədbirdə çıxış edərək, iki ölkə arasındakı münasibətlərə toxunub və Azərbaycan ilə ŞKTC arasında çox güclü bir qəlb bağının olduğunu bildirib.
Turganer: "Bu bağ qədim tarixə söykənən, dərin və sarsılmaz bir qardaşlıqdır. Bu qardaşlığı daha da möhkəmləndirmək və əlaqələrimizi gücləndirmək üçün kiçik, amma mənalı bir addım atmaq istədik. Bugünkü sərgidə nümayiş olunan əsərlər çox dəyərlidir. Həm peşəkar, həm də həvəskar Azərbaycanlı rəssamlar, ölkələrimizin təbiətini, mədəniyyətini və sivilizasiyasını əks etdirən əsərlərlə sərgiyə qatıldılar", – deyə bildirib.
Azərbaycan–ŞKTC Parlamentlərarası Dostluq Qrupunun sədri Cavanşir Feyziyev isə Azərbaycanlı rəssamların ŞKTC-yə xüsusi maraq göstərdiklərini vurğulayıb və əlavə edib: "Digər mədəniyyət insanlarımız kimi rəssamlarımız da zaman-zaman ŞKTC-yə gedərək orada əsərlər yaradırlar. Bu işlər, Azərbaycanlı rəssamların ŞKTC-yə dair təəssüratlarının sənətkarlıq yansımasıdır. Layihə, ölkələrimiz arasındakı mədəni əlaqələrin güclənməsinə kömək edərkən, eyni zamanda ŞKTC-nin turizm potensialının təbliği baxımından da əhəmiyyətlidir. Növbəti mərhələdə sərginin ŞKTC-də keçirilməsi planlaşdırılır".
YAP Yasamal Rayon Təşkilatının sədr müavini Elnarə Mustafayeva isə qardaşlıq bağlarının yüksək mənəvi dəyərlərin təzahürü olduğunu qeyd edərək, belə sərgilərin ölkələrarası münasibətləri gücləndirdiyini və Azərbaycan ilə ŞKTC arasındakı əlaqələrin inkişafına töhfə verdiyini bildirib.
Hadisənin gedişatını izləmək üçün ain.az saytında ən son yeniliklərə baxın.
