Praqada xarici siyasət bəyanatlarının baş nazirin səlahiyyətində olduğu vurğulanır...
Çexiyanın yeni müdafiə naziri Yaromir Zuna ukraynalı həmkarının Ukraynaya səfər dəvətini qəbul etməyib.
Poliqon xəbər verir ki, bu barədə parlamentdə “Azadlıq və Birbaşa Demokratiya” (SPD) Partiyasının fraksiyasının sədri Tomio Okamura məlumat verib. Onun sözlərinə görə, bu qərar Çexiyada xarici siyasət məsələlərinin birbaşa baş nazir Andrey Babişin səlahiyyətinə aid olması ilə izah olunur.
Novinky nəşrinin yazdığına görə, Tomio Okamura eyni zamanda SPD-nin Ukrayna üçün Çexiya büdcəsi hesabına silah alınmasına qarşı mövqeyini də bir daha təsdiqləyib. Partiya Müdafiə Nazirliyindən Ukraynaya sursat tədarükünü nəzərdə tutan beynəlxalq təşəbbüsdən Çexiyanın çıxması üçün müvafiq sənədlərin hazırlanmasını tələb edir. SPD rəhbərliyi hesab edir ki, bu təşəbbüs ölkənin milli maraqlarına uyğun deyil və dövlət büdcəsinə əlavə yük yaradır.
Bundan əlavə, SPD planlaşdırılan F-35 qırıcılarının alınmasını da “uyğunsuz və həddindən artıq baha” adlandırır. Partiya bu müqavilənin yenidən nəzərdən keçirilməsini və şərtlərinin dəyişdirilməsini gündəmə gətirmək niyyətindədir. Okamuranın sözlərinə görə, mövcud təhlükəsizlik şəraitində bu cür iri həcmli hərbi xərclər əsaslandırılmayıb.
Novinky xatırladır ki, daha əvvəl Çexiya hökuməti daxilində razılaşma əldə olunub və bu razılaşmaya əsasən, müdafiə naziri Yaromir Zuna yalnız ordunun fəaliyyəti və təhlükəsizlik məsələlərinə cavabdeh olacaq. Xarici siyasətlə bağlı açıqlamalar, o cümlədən Ukrayna istiqaməti üzrə rəsmi mövqelər isə birbaşa baş nazir Andrey Babiş tərəfindən səsləndiriləcək.
Poliqon.info
