BAKI, 23 dekabr. TELEQRAF
Türkiyə və Azərbaycan iki prezidentin qoyduğu məqsədə - on beş milyard dollara çatmaq istiqamətində səylə çalışır.
Teleqraf xəbər verir ki, bu barədə Türkiyənin ticarət naziri Ömer Bolat jurnalistlərə açıqlamasında deyib.
O qeyd edib ki, ticarəti həyata keçirənlər tacirlər, sənayeçilər, idxalçılar və ixracatçılardır:
“Biz həmçinin onlarla yönverici işlərlə məşğuluq. Dünən Hökumətlərarası İqtisadi Komissiyanın iclasında vitse-prezidentimiz Cevdet Yılmaz və Azərbaycanın Baş naziri Əli Əsədov anlaşma imzaladı. Bütün nazirlər orada idilər və biz tapşırıqlarımızı aldıq. Hər sahədə həqiqətən də, əla münasibətlərimiz var və qarşılıqlı investisiyaları artırmaq istəyirik. Azərbaycanda 18 milyard dollarlıq investisiya ilə 7000 türk şirkəti, Türkiyədə isə 21 milyard dollarlıq investisiya ilə 3000 Azərbaycan şirkəti var.
Onların hamısı həyatlarından məmnundurlar. Problemləri olanda onları dərhal həll etməyə çalışırıq. Nazirlər, prezidentlər və özəl sektor təşkilatları əməkdaşlıq edir. Türkiyə ilə Azərbaycan arasında iqtisadiyyat və ticarətdə daha yüksək hədəflərə çatmaq üçün var gücümüzlə çalışırıq”.
Nazir 2021-ci ildə qüvvəyə minən güzəştli ticarət sazişini xatırladıb:
“Bundan əlavə, qarşılıqlı olaraq 2024-cü ildə qüvvəyə minən protokol imzaladıq. Artıq bunların ticarət və iqtisadi münasibətlərimizdə müsbət təsirlərini gördük. Türkiyə-Azərbaycan Azad Ticarət Sazişini görmək istərdik. Hər iki hökumətin texniki qrupları bu məsələni müzakirə edir, təsir təhlilləri və qiymətləndirmə tədqiqatları aparır. Ümid edirəm ki, vaxt keçdikcə buna nail olacağıq”.
