“Bloomberg”in analitikasına əsasən, “Citigroup” strateqləri Çin səhmləri üzrə proqnozu aşağı salıb, Tayvan səhmləri üzrə isə yüksəldib.
“Citi”nin Çin səhmləri üzrə tövsiyəsi əvvəlki “bazardan üstün” səviyyəsindən “neytral”a endirilib. Strateqlər şirkətlərin mənfəət proqnozlarının mənfi istiqamətdə yenidən nəzərdən keçirilməsini və zəif makroiqtisadi perspektivləri əsas gətiriblər. Tayvan üzrə proqnoz isə “neytral”dan “bazardan üstün” səviyyəsinə qaldırılıb. “Citi” regionun süni intellekt üçün avadanlıq istehsalında əsas rolunu vurğulayıb.
“Bloomberg” qeyd edir ki, “Citi”nin Çin səhmləri ilə bağlı mövqeyindəki dəyişiklik ölkə bazarının artımını hələ də gözləyən digər qlobal bankların baxışları fonunda seçilir. Məsələn, “JPMorgan Chase” noyabrda Çində süni intellektin tətbiqinin sürətlənməsini və istehlakın stimullaşdırılması tədbirlərini əsas gətirərək Çin səhmləri üzrə tövsiyəni yüksəldib. “Citi” isə iyul ayında Çin üzrə tövsiyəni “bazardan üstün” səviyyəsinə qaldırmış, mənfəət proqnozlarının yaxşılaşmasını və cəlbedici qiymətləndirmələri qeyd etmişdi. Həmin vaxtdan bəri “MSCI China” indeksi təxminən 8% artıb, daha geniş “MSCI Asia Pacific” indeksi isə 11% yüksəlib.
İnkişaf etməkdə olan ölkələrin bazarları üçün “bazardan üstün” proqnozu olduğu kimi qalıb. Bu, mənfəətin güclü dinamikası, ABŞ Federal Ehtiyat Sisteminin pul-kredit siyasətinin yumşaldılması fonunda qlobal iqtisadiyyatda “qızıl orta” vəziyyətinin formalaşması və süni intellektlə bağlı investisiyalarla əlaqələndirilir. Strateqlər 2026-cı ildə inkişaf etməkdə olan bazarların əsas fond bazarı regionları arasında səhm başına mənfəətin ən yüksək artımını göstərəcəyini gözləyirlər.
“Citi”nin 2026-cı ilin sonuna dair proqnozlaşdırdığı “MSCI Emerging Markets” indeksinin hədəf səviyyəsi 1540 bənddir. “Bloomberg”in məlumatına görə, bu, dekabrın 22-də ticarətin bağlanış səviyyəsi ilə müqayisədə 11% artım deməkdir. Bakı vaxtı ilə 23 dekabr saat 14:07-də “MSCI Emerging Markets” indeksi 1386,5 bənd təşkil edib (+0,2%).
