Dekabrın 24-nə keçən gecə Ankara yaxınlığındakı Haymana bölgəsində Liviyanın Silahlı Qüvvələrinin Baş Qərargah rəisi Məhəmməd Əli Əhməd əl-Həddadın da içində olduğu təyyarənin qəzaya uğraması ilə bağlı yeni təfərrüatlar ortaya çıxıb. Hadisə baş verib.
NOCOMMENT.az xəbər verir ki, Türkiyə paytaxtındakı mənbələrin verdiyi məlumata görə, Əsənbuğa hava limanından havaya qalxdıqdan qısa müddət sonra liviyalı generalı və nümayəndə heyətini daşıyan təyyarənin ekipajı elektrik sistemində nasazlıq siqnalı verib və geri qayıtmaq üçün icazə istəyib. Türkiyə tərəfi fövqəladə eniş üçün bütün hazırlıqları görüb, lakin bundan az sonra təyyarə radarlardan itib.
Türkiyənin nəqliyyat naziri Abdulkadir Uraloğlunun sözlərinə görə, Ankaradan saat 20:17-də havaya qalxan özəl təyyarə 20:31-də elektrik nasazlığı ilə bağlı siqnal verib və geri qayıtmaq üçün icazə istəyib. 20:32-də pilot eniş üçün məsafə və koordinatlarla təmin olunub, Əsənbuğa hava limanı dərhal digər uçuşlar üçün bağlanıb. Buna baxmayaraq, 20:38-də təyyarə radarlardan itib və yalnız saat 22:00-da onun qalıqları aşkarlanıb.
Rəsmi olaraq təyyarənin qəsdən vurulmasına dair hər hansı sübut hələ təqdim edilməyib. Mövcud olan çoxsaylı fərziyyələrə baxmayaraq, aparıcı türk aviasiya ekspertləri hadisənin texniki nasazlıq nəticəsində baş verdiyi versiyasına üstünlük verirlər.
Mütəxəssis Uğur Cəbədcinin sözlərinə görə, diversiya ehtimalı tamamilə istisna edilməsə də, mövcud dəlillər əsasən texniki səbəblərə işarə edir.
“Əgər təyyarə sabotaj nəticəsində partlasaydı, pilotların bu barədə dispetçerə məlumat verməyə vaxtı qalmazdı”, – deyə o bildirib.
Məlumata görə, iki “qara qutu”nun analiz edilmədən qəzanın səbəblərini dəqiq müəyyənləşdirmək və şərh vermək mümkün deyil. Bildirilir ki, qutuların deşifrə prosesi Türkiyə və Liviya nümayəndələrinin, eləcə də təyyarənin istehsalçısı olan Fransanın Dassault Falcon şirkətinin birgə iştirakı ilə aparılacaq.
