Ankarada baş verən faciənin arxasında əvvəlcədən proqramlaşdırılmış müdaxilə ola biləcəyi iddia edilir...
Poliqon xəbər verir ki, Türkiyənin “Hürriyet” nəşrinin hakimiyyət dairələrinə yaxın köşə yazarı Abdülkadir Selvi Ankarada Liviya Silahlı Qüvvələrinin Baş Qərargah rəisinin olduğu təyyarənin qəzaya uğramasını təsadüf hesab etmir və hadisənin arxasında xarici qüvvələrin dayana biləcəyini iddia edir.
Jurnalistin sözlərinə görə, aviaqəzanın əsas səbəbi təyyarənin elektron sisteminə əvvəlcədən yüklənmiş və uçuşdan sonra aktivləşdirilmiş proqram olub. O bildirib ki, bu müdaxilə havaya qalxdıqdan sonra işə düşüb və nəticədə təyyarənin idarəetmə sistemi sıradan çıxıb.
Selvi diqqətə çatdırıb ki, qəzaya uğrayan təyyarə Malta bayrağı altında qeydiyyatdan keçib. Onun fikrincə, Malta İsrailin “Mossad” xüsusi xidmət orqanı və Böyük Britaniya kəşfiyyatının fəal fəaliyyət göstərdiyi ölkələrdən biridir. Bu amil də hadisənin arxasında xarici maraqların ola biləcəyi ehtimalını gücləndirir.
Məlumata görə, Ankaradakı hava limanından qalxdıqdan təxminən 14 dəqiqə sonra təyyarədə elektrik avadanlıqları ilə bağlı ciddi problemlər yaranıb. Kokpitdəki ekran bir neçə dəfə qaralıb, sonda isə tamamilə sıradan çıxıb. Bu, ekipajın təyyarəyə nəzarəti itirməsinə və nəticədə hava gəmisinin qəzaya uğramasına səbəb olub.
Xatırladaq ki, bir neçə gün əvvəl Türkiyədə keçirilən görüşlərdən sonra Liviya Silahlı Qüvvələrinin Baş Qərargah rəisinin rəhbərlik etdiyi nümayəndə heyəti Falcon 50 tipli təyyarə ilə Ankaradan Tripoliyə qayıtmalı idi. Lakin təyyarə havaya qalxdıqdan qısa müddət sonra naməlum səbəblərdən qəzaya uğrayıb. Hadisə zamanı göyərtədə olan 8 nəfərin hamısı həlak olub. Qəzanın dəqiq səbəbləri hələlik rəsmi şəkildə açıqlanmayıb.
Poliqon.info
