Bu mövsüm Çempionlar Liqasında göstərdiyi oyun və nəticə ilə nəinki Avropanın, hətta dünyanın da diqqətini çəkən “Qarabağ”da vəziyyət heç də yaxşı deyil. Belə ki, bir neçə futbolçu qış “transfer pəncərəsi”ndə komandadan ayrılmağa çox yaxındı. Bunlar Marko Yankoviç, Pedro Bikalyo, Mateus Silva, Mateuş Koxalski və Nəriman Axundzadədi. Bu futbolçuların, demək olar ki, hamısı Qurban Qurbanovun sisteminin əsəridi.
Hansısa möcüzə baş verməsə, Yankoviç elə qışdaca komandadan ayrılacaq. Özü də getmək istəyir. “Qəbələ” ilə oyundan sonra Qurban Qurbanova Yankoviçin də bu siyahıda olub-olmadığı haqda sual verildi, təcrübəli mütəxəssis inkar etmədi. 30 yaşlı yarımmüdafiəçi “Qarabağ”ın əsas simalarından biridi. Amma son oyunlarda heç də özünə oxşamır. “Sabah” və “Qəbələ” ilə çempionat oyunları bir yana, ÇL-də “Ayaks”la oyunda da iki qol məhz rəqiblər onu rahatlıqla keçəndən sonra vuruldu. Klub onu buraxmaq istəmir deyə, artıq monteneqrolu futbolçunun da motivasiyası aşağı düşüb, meydanda can qoyunue. Açığı, belə gün keçirməkdənsə, getməsi yaxşıdı. 30 yaşlı Yankoviçin 800 min avro “transfermarkt” dəyəri var.
Yaydakı yoxlama oyunlarına baxanda Pedro Bikalyonun klub tarixinin ən zəif transferlərindən biri olduğunu düşünmüşdüm. Onun səhvindən neçə qol buraxılmışdı. Adi ötürmələrdə dəqiqliyi çatmırdı. Amma Qurbanovun “sehrli çubuğu” bu futbolçunu da dəyişdi, o, komandanın əsas fiquruna çevrildi. Hətta dayaq yarımmüdafiəçi mövqeyində Yankoviçi də kölgəyə atdı, ÇL-də matçın ən yaxşısı seçildi. Cəmi 3-4 aylıq oyunundan sonra bu futbolçunun da xeyli elçisi var. Birincisi də “Botafoqo”du. Braziliya klubu “Qarabağ”ın istədiyi məbləği vermir, amma futbolçuya burda aldığı maaşın qat-qat artığını təklif edir. Futbolçu da getmək istəyir. Qurbanov da buraxmaq istəmir deyə, motivasiya düşkünlüyü yaşayır, Yankoviç kimi formasından uzaq oyun sərgiləyir. Qeyd edək ki, Bikalyonun “transfermarkt” qiyməti 1,5 milyon avrodu.
Mateus Silva da gedən qatarın sərnişinlərinə oxşayır. Belə ki, artıq ikinci mövsüm sabit performans göstərən müdafiəçi haqda xarici mətbuatda transfer söhbətləri gəzir. Hətta braziliyalı həmkarlarımız Karlo Ançelottiyə onu yığmaya çağırmağı təklif edir. Ölkəsində diqqət mərkəzində olan futbolçularndandı. Ötən mövsüm Avropa, bu mövsüm isə Çempionlar Liqasında həm müdafiə, həm də hücum xəttində “Qarabağ”a böyük fayda verir. Düzdü, Qurban Qurbanov bu mövsüm onun ehtiyatda olacağını düşünürdü. Dani Boltu əsas sağ cinah müdafiəçisi kimi almışdı. Lakin braziliyalı müdafiəçi özünü sübut etdi, forma rəqabətindən qalib ayrıldı. Silvanin “transfermarkt” dəyəri 1 milyon avrodu.
Mateuş Koxalskinin adı isə “Napoli” və Dortmund “Borussiya”sı ilə yanaşı hallanır. Düzdü, “Napoli”də Milinkoviç-Saviç, “Borussiya”da Qreqor Kobel kimi səviyyəli qapıçılar var. Amma onların mümkün satış ehtimalını nəzərə alaraq Koxalskini heyətlərinə cəlb etmək istəyirlər. 25 yaşlı polşalı qapıçının 2 milyon avro “transfermarkt” dəyəri var.
Gedə biləcək futbolçulardan biri də Nəriman Axundzadədi. Təki bundan sonra oxşamasın, Mahir Emrelinin 5-6 il əvvəlki karyerasına oxşar vəziyyət yaşayır. Futboldan başı çıxan-çıxmayan hər kəsin tənqid hədəfidi. Azarkeşlərin də çoxu onu istəmir. Qurban Qurbanov isə israrla ona şans verir. Əslində təsnifat mərhələlərində olduqca yaxşı oynayırdı. Amma yerli-yersiz tənqidlər 21 yaşlı hücumçunu depressiyaya saldı. Onu istəyən, ciddi təklif edən klub yoxdu. Amma Nəriman sözün əsl mənasında baş götürüb ölkədən getmək istəyir. Bir neçə aydı sosial şəbəkə hesablarını da bağlayıb. Psixoloji cəhətdən həqiqətən də heç yaxşı vəziyyətdə deyil. Bu məqam oyununa da təsir edir. “Qarabağ”ın ən dəyərli futbolçularından biridi və “transfermarkt” qiyməti 2,5 milyon avrodu.
Yaxşı, bu futbolçular getsə, indiki heyətdə onları əvəzləyə biləcək kim var? Yankoviç getsə, “Qarabağ” üçün elə də ciddi problem yaşanmaya bilər. Çünki zədəyəmeyilli futbolçudu. Gələndən bəri “Qarabağ”ın bir çox vacib oyununda komandasına kömək edə bilməyib. Xoni Montiel isə bu mövqedə oynayır, yaxşı da oynayır. Addım-addım “artırır”. Amma Yankoviçlə birgə Bikalyo da getsə, vay “Qarabağ”ın halına... Çünki Kuaku istənilən formanı yaxalaya bilmir, “Qarabağ”ın hədəflərinə çatmasına imkan verən futbolçu deyil.
Mateus Silva da həmçinin. Bolt çempionatda fərq yarada bilmir. “Ayntraxt”, “Liverpul” kimi komandalara qarşı nə edə bilər? O cinahda Abbas Hüseynov da var. Sadəcə, adı var. Hərdənbir protokola salınır, ehtiyatda qalır. Hə, bir də yığmaya çağrılır. Amma Boltla Abbas ikisi bir yerdə Mateus Silvanı əvəz edə bilməz.
Ən böyük problem isə Koxalskinin gedişi olardı. Şahruddin Məhəmmədəliyev zədəlidi, özü də xroniki. Heç vaxt əvvəlki formasında olmayacaq. Onsuz da sabit çıxış etməyib, bundan sonra da “Qarabağ”ın əsas qapıçısı olacaq vəziyyətdə deyil. Buntiçi isə son turda Qəbələdə gördük. İki vacib seyv etsə də, birinci qolda günahkarlardan biri də qapıçı idi. Koxalski çox güclüdü. Buntiç heç cür o güvəni verə bilməz. Çıxışlarda da inamlı görünmür.
Nəriman Axundzadə isə artıq əsas heyətdə yerini itirib. Kamilo Duran oynayır. Nərimanın alternativi kimi Musa Qurbanlı da var. Amma etiraf edək ki, Musa Nəriman səviyyəsində deyil, faydalı iş əmsalı daha aşağıdı.
“Qarabağ” bu gedişlərdən maliyyə baxımından qazanacaq, ancaq güc olaraq itirəcək. Amma klubun prioriteti maliyyə deyil. ÇL-in pley-offuna düşsələr, onsuz da yaxşı pul qazanacaqlar. Heyəti qorumaq vacibdi. Vacib olduğu qədər də çətindi. Amma gedən ayağı da saxlamaq olmaz. Futbolçu şəxsən getmək istədiyini deyirsə, onu istəyən klubla birtəhər razılaşıb yola salmaq lazımdı. Heç bir futbolçu klubdan böyük deyil!
MÜZƏFFƏR QULUZADƏ
- Ночной Режим
- Домашняя страница
- Статистика
- Источники
- Рейтинг
- Погода
- Валюта
