Ajans.azVaticanNews-a istinadən xəbər verir ki, yardım mülki əhali üçün nəzərdə tutulan 100 min porsiya hazır şorbadan ibarətdir. Müqəddəs Taxt-tacın Milad humanitar təşəbbüsləri ilə bağlı hesabatında bildirilir ki, bu yardım döyüşlərdən, eləcə də elektrik enerjisi, su və istilik təchizatında yaranan fasilələrdən ən çox zərər çəkən bölgələr üçün nəzərdə tutulub. Vatikanın qeyd etdiyinə görə, təşəbbüs müharibə və məcburi köçkünlükdən əziyyət çəkən insanlara dəstək məqsədi daşıyan daha geniş humanitar səylərin tərkib hissəsidir. Müxtəlif dadlarda hazır şorba daşıyan üç yük maşını Milad bayramı ərəfəsində Vatikana çatdırılıb. Məhsullar Müqəddəs Taxt-tacın humanitar layihələrini dəfələrlə dəstəkləyən Koreya şirkəti tərəfindən təmin olunub. Papa bu humanitar yardımın Ukraynaya, xüsusilə də aktiv döyüşlərin getdiyi və insanların əsas yaşayış şəraitindən məhrum olduğu bölgələrdəki icmalara göndərilməsi barədə qərar verib. Vatikan Xəbərləri vurğulayır ki, “Papa təkcə sülh üçün dua etmir, eyni zamanda əziyyət çəkən ailələrə yaxın olmağa çalışır”.
