Fox News-un danışıqlardan məlumatlı mənbəyə istinadən verdiyi xəbərə görə, Ukrayna prezidenti Volodimir Zelenski ilə Rusiya prezidenti Vladimir Putin beş ildən artıq fasilədən sonra ilk dəfə birbaşa telefon danışığı apara bilərlər.
Məlumata əsasən, ABŞ prezidenti Donald Trampın Zelenski ilə Florida ştatında, Mar-a-Laqo iqamətgahında keçirdiyi görüş Kiyev və Kreml arasında birbaşa telefon əlaqəsinin qurulmasına yol aça bilər. Mənbə bu ehtimalı sülh danışıqlarına hazırlıq baxımından mühüm irəliləyiş kimi qiymətləndirib.
Anonim mənbənin bildirdiyinə görə, Putinin telefon danışığına razılıq verməsi sülh prosesində ilk real addım və indiyədək əldə olunmuş ən böyük nailiyyət ola bilər. ABŞ-da bu perspektiv artıq Donald Tramp üçün mümkün “diplomatik qələbə” kimi dəyərləndirilir.
Qeyd olunur ki, Zelenski ilə Putin arasında uzun illərdir davam edən şəxsi gərginlik fonunda Tramp hazırda “ən uğurlu vasitəçi” kimi görünür.
Mənbə eyni zamanda bildirir ki, əsas çətinlik Putinin Zelenski ilə birbaşa danışmaq istəməməsidir. Liderlər sonuncu dəfə 2020-ci ildə, Ukraynanın “Vaqner” PMC yaraqlılarına qarşı keçirdiyi, lakin uğursuz nəticələnən xüsusi əməliyyatdan sonra əlaqə saxlayıblar. Bundan sonra Putin bir neçə dəfə birbaşa dialoqdan imtina edib. 2024-cü ildə isə Ukrayna ordusunun Kursk bölgəsində apardığı əməliyyatdan sonra mümkün təmaslar tamamilə dayanıb.
Buna baxmayaraq, Vaşinqton hesab edir ki, ABŞ-ın iştirakı ilə aparılan hazırkı danışıqlar Moskvanı birbaşa ünsiyyətə sövq edə bilər. Bildirilir ki, müzakirələr ABŞ-ın dəstəklədiyi 20 bəndlik sülh planı üzərində cəmləşib və bu planın təxminən 90 faizi artıq razılaşdırılıb. Planın icrası tərəflər arasında birbaşa əlaqənin qurulmasını tələb edir.
Zelenski isə açıq şəkildə bəyan edib ki, ABŞ tərəfindən hüquqi cəhətdən məcburi təhlükəsizlik zəmanətləri Ukrayna üçün istənilən razılaşmanın əsas şərti olaraq qalır.
Ağ Ev və Amerika vasitəçilərinin fikrincə, Zelenski ilə Putin arasında baş tutacaq hətta tək bir telefon danışığı belə dönüş nöqtəsi ola və tərəflərin pərdəarxası təmaslardan birbaşa dialoqa keçməyə hazır olduqlarının ilk real siqnalına çevrilə bilər.
