Ukrayna Prezidenti Volodimir Zelenski ABŞ Prezidenti Donald Trampın sülh sazişlərinin tamamlanması üçün yalnız bir-iki məsələ qaldığını bildirməsindən sonra bu məsələlərin hansılar olduğunu dəqiqləşdirib.
“RBC-Ukraina” xəbər verir ki, Zelenski bu barədə jurnalistlərin suallarını cavablandırarkən danışıb.
Zelenskinin sözlərinə görə, hazırlanmış 20 maddəli sənəd təxminən 90% hazırdır. Yalnız iki əsas maddə hələ razılaşdırılmayıb: “Bunlar Zaporojye AES-in necə fəaliyyət göstərəcəyi və ərazilər məsələsidir”.
O qeyd edib ki, məhz bu maddələr üzrə razılaşmanın olmaması sənədin tam yekunlaşmasını hələ mümkün etmir. Eyni zamanda, Prezident vurğulayıb ki, təhlükəsizlik təminatları məsələsi artıq tam razılaşdırılıb.
“Təhlükəsizlik təminatlarına gəldikdə isə hər şey 100% hazırdır. Biz yalnız təminatların qüvvədə olma müddəti ilə bağlı bəzi detalları müzakirə edirik”, – Zelenski əlavə edib.
