Ana südü ilə qidalandırma doğuşdan illər sonra da qadınların psixoloji sağlamlığına müsbət təsir göstərir.
Redaktor.az xəbər verir ki, bu barədə "BMJ Open" jurnalında dərc olunan yeni araşdırmada qeyd olunub.
Araşdırmaya görə, ana südü ilə qidalandırma analarda depressiya və təşviş pozuntusu riskini doğuşdan sonra hətta 10 il ərzində də azalda bilər.
Alimlər ikinci hamiləlikdən sonra 168 qadını 10 il ərzində müşahidə ediblər. Tədqiqat zamanı qadınların ana südü ilə qidalandırma xüsusiyyətləri, həmçinin depressiya və təşviş pozuntularının olub-olmaması qiymətləndirilib.
Məlum olub ki, iştirakçıların təxminən 73 faizi körpəsini müəyyən müddət ana südü ilə qidalandırıb. Orta hesabla yalnız ana südü ilə qidalandırma 5,5 həftə davam edib. Qadınların üçdə birindən çoxu isə ümumilikdə ən azı bir il körpəsini ana südü ilə qidalandırıb. Doğuşdan 10 il sonra iştirakçıların 13 faizində depressiya və ya təşviş əlamətləri müşahidə olunub.
Təhlillər göstərib ki, ana südü ilə daha uzun müddət qidalandıran qadınlarda orta yaş dövründə psixoloji problemlər daha az qeydə alınıb. Eyni zamanda, depressiya və ya təşviş pozuntusu olan qadınların ümumilikdə ana südü ilə qidalandırma müddətinin daha qısa olduğu müəyyən edilib.
Araşdırmaya əsasən, ana südü ilə yalnız qidalandırmanın hər əlavə həftəsi qadınlarda depressiya və təşviş riskinin təxminən 2 faiz azalması ilə əlaqələndirilir. Bu nəticələr qadınların yaşı, fiziki aktivliyi və alkoqol qəbulu kimi amillər nəzərə alınmaqla əldə edilib.
Müəlliflər bildirirlər ki, araşdırma səbəb-nəticə əlaqəsini tam sübut etmir, çünki iştirakçı sayı az olub və psixoloji sağlamlıq göstəriciləri öz-özünə hesabatlara əsaslanıb. Bununla belə, nəticələr ana südü ilə qidalandırmanın anaların uzunmüddətli psixoloji rifahı ilə mümkün əlaqəsini göstərir və bu qidalanmanın təkcə körpələr üçün deyil, analar üçün də faydalı olduğunu bir daha təsdiqləyir.
Nuriyyə NATİQQIZI
