Satışdan əldə olunan gəlir ABŞ tərəfindən idarə olunan hesablar vasitəsilə saxlanılır və gələcəkdə bölgə üçün istifadə olunacaq...
Poliqon xəbər verir ki, ABŞ prezidenti administrasiyası Venesueladan olan ilk neft partiyasını 500 milyon dollar dəyərində satıb. Bu barədə Semafor portalı mənbələrə istinadla məlumat yayıb.
Məlumatda qeyd olunur ki, satışdan əldə olunan gəlir ABŞ hökumətinin nəzarətində olan bank hesablarında saxlanılır və əsas hesabın yerləşdiyi yer Qətərdir. Portalın mənbəsi izah edib ki, Qətər ABŞ üçün neytral məkandır və vəsaitlərin təhlükəsiz saxlanması və köçürülməsi üçün əlverişlidir.
Yanvarın 3-də ABŞ Venesuelaya zərbə endirib: partlayışlar paytaxt Karakas və Fort-Tiuna hərbi bazasında baş verib. ABŞ prezidenti Donald Tramp əməliyyatı uğurlu adlandıraraq Venesuela prezidenti Nikolas Maduro və həyat yoldaşının ABŞ hərbçiləri tərəfindən ələ keçirildiyini bildirib. Tramp vurğulayıb ki, Maduro artıq prezident deyil və Venesuelanın idarəsi “səlahiyyətlərin təhvil verilməsinə qədər” ABŞ tərəfindən həyata keçirilir.
Yanvarın 7-də ABŞ Energetika Nazirliyi dünya bazarında Venesuela neftinin satışına başladığını açıqlayıb. Nazirliyin məlumatına görə, satışdan əldə olunan vəsait ABŞ tərəfindən idarə olunan bank hesablarına köçürüləcək və sonra Vaşinqtonun qərarına uyğun olaraq həm Amerika, həm də Venesuela xalqının xeyrinə paylanacaq.
Poliqon.info
