Avstraliyada uşaqların sosial şəbəkələrə çıxışını məhdudlaşdıran yeni qanunun qüvvəyə minməsindən sonra ən iri sosial platformalar tərəfindən kütləvi bloklamalar həyata keçirilib. Rəsmi məlumata görə, dekabr ayında 16 yaşından kiçik istifadəçilərə məxsus təxminən 4,7 milyon hesab bağlanıb.
Milli onlayn təhlükəsizlik tənzimləyicisi eSafety bildirir ki, məhdudiyyətlər 10 dekabr tarixindən tətbiq olunmağa başlanıb, hesabların əsas hissəsi isə ayın ilk yarısında deaktiv edilib. Qeyd olunur ki, bu addımlar uşaqların internet mühitində üzləşə biləcəyi risklərin azaldılması məqsədi daşıyan və dünyada analoqu olmayan təşəbbüs çərçivəsində atılıb.
Rəsmilərin qiymətləndirməsinə əsasən, bloklanan hesabların sayı 28 milyon əhalisi olan Avstraliyada azyaşlıların sosial şəbəkələrdən istifadə səviyyəsinin kifayət qədər yüksək olduğunu göstərir.
Instagram və Facebook platformalarının sahibi olan Meta şirkəti də yeni qanunvericiliyin tələblərinə uyğun olaraq təxminən 550 min hesabın deaktiv edildiyini açıqlayıb.
eSafety komissarı Culiya İnman Qrant bildirib ki, hələlik bütün platformaların qanuna tam əməl edib-etmədiyini demək tezdir. Bununla belə, ilk nəticələrin müsbət olduğunu vurğulayıb. Tənzimləyici qurum hansı sosial şəbəkənin neçə hesab bağladığını açıqlamayıb.
