Clash Report-un məlumatına görə, Rakka və Həsəkədə kütləvi qətllər və etnik təmizləmə həyata keçirilir...
Poliqon xəbər verir ki, Clash Report-un yaydığı məlumatda SDS/PKK silahlı dəstələrinin mövcud atəşkəs rejimini pozaraq əks-hücuma keçdiyi və strateji əhəmiyyətə malik əl-Şəddadi şəhərini nəzarətə götürdüyü bildirilir. Məlumata əsasən, silahlı qruplaşma hücum zamanı bir neçə yaşayış məntəqəsində mövqelərini möhkəmləndirib və bölgədə gərginlik kəskin şəkildə artıb.
Qeyd olunur ki, SDS/PKK silahlıları tərəfindən Rakka və Həsəkə əyalətlərində dinc əhaliyə qarşı kütləvi qətllər və etnik təmizləmə əməliyyatları aparılır. Yerli mənbələrin iddialarına görə, son günlərdə həyata keçirilən zorakılıq aktları nəticəsində 300-dən çox mülki şəxs həlak olub, yüzlərlə insan isə yaralanıb və ya öz evlərini tərk etməyə məcbur qalıb.
Məlumatda vurğulanır ki, silahlı dəstələr yaşayış məhəllələrinə basqınlar edir, mülki şəxsləri zorla köçürür və etnik mənsubiyyətə görə hədəf alırlar. Hadisələr fonunda bölgədə humanitar vəziyyətin sürətlə pisləşdiyi, xəstəxanaların və yardım infrastrukturunun ciddi yüklə üzləşdiyi bildirilir.
Hazırda baş verənlərlə bağlı beynəlxalq qurumların və regional aktorların mövqeyi gözlənilir. Ekspertlər hesab edirlər ki, atəşkəsin pozulması və mülki əhaliyə qarşı zorakılığın artması Suriyanın şimal-şərqində təhlükəsizlik balansını daha da sarsıda bilər.
Poliqon.info
