Əməkdaşlıq tarixində ilk dəfə ticarət həcmi 100 milyard dollar həddini keçib...
Poliqon xəbər verir ki, 2025-ci ildə Çinin Mərkəzi Asiya ölkələri ilə iqtisadi və ticarət əməkdaşlığı nəzərəçarpacaq dərəcədə genişlənib. ÇXR Ticarət Nazirliyinə istinadla “Sinxua” agentliyinin yaydığı məlumata görə, iki tərəf arasında əmtəə dövriyyəsinin həcmi 106,3 milyard ABŞ dollarına çatıb ki, bu da əvvəlki illə müqayisədə 12 faiz artım deməkdir.
Qeyd olunur ki, bu göstərici tarixdə ilk dəfə olaraq 100 milyard dollar həddini aşıb və Çinlə Mərkəzi Asiya ölkələri arasında ticarət əlaqələri ardıcıl beş il müsbət artım trayektoriyasını qoruyub. Ötən il Çin ilk dəfə olaraq Mərkəzi Asiya dövlətlərinin ən böyük ticarət tərəfdaşı olub. Hesabat dövründə Çinin regiona ixracı illik ifadədə 11 faiz artaraq 71,2 milyard dollara yüksəlib. Bu artım əsasən maşınqayırma, mexaniki və elektrik avadanlıqları, eləcə də yüksək texnologiyalı məhsulların istehsalındakı sıçrayışla əlaqələndirilir.
Eyni zamanda, Mərkəzi Asiya ölkələrindən Çinə idxal 14 faiz artaraq 35,1 milyard dollara çatıb. Ticarətin genişlənməsində transsərhəd ödəniş mexanizmlərinin təkmilləşdirilməsi və maliyyə əməkdaşlığının daha səmərəli qurulması mühüm rol oynayıb.
ÇXR Ticarət Nazirliyi əldə olunan nəticələr sırasında internet infrastrukturunun inkişafı, maşınqayırma və kənd təsərrüfatı sahələrində bir sıra iri layihələrin sürətləndirilməsini xüsusi vurğulayır. Bu layihələr Mərkəzi Asiya ölkələrində sənaye potensialının artmasına və ümumi iqtisadi yüksəlişə müsbət təsir göstərib. Nazirlik gələcəkdə ticarətin strukturunun optimallaşdırılmasını, yeni biznes formalarının inkişafını və institusional mexanizmlərin yaradılmasını davam etdirməyi planlaşdırır.
Poliqon.info
