Bakı, 21 yanvar, AZƏRTAC
Yanvarın 22-də və 24-də futzal üzrə Azərbaycan millisi Danimarka yığması ilə qarşılaşacaq.
AZƏRTAC xəbər verir ki, yoldaşlıq oyunlarına hazırlıqla bağlı yığmanın təcrübəli üzvü Oktay Rüstəmli Azərbaycan Futzal Federasiyasının rəsmi saytına açıqlama verib.
“Hazırlığımız davam edir. Yanvarın 18-dən məşqlər qrafik üzrə həyata keçirilir. Heyətimizdə gənc futzalçılar da var. Baş məşqçinin müəyyən tələbləri var. Əsas istəyi müdafiədə diqqətli olmaq, səhvsiz oynamaq və sürətli hücuma çıxmaqdır. Elə etməliyik ki, top daha çox bizdə qalsın. Məşqlərdə bunların üzərində işləyirik. Standart vəziyyətlərlə bağlı da tapşırıqlar yerinə yetiririk. Məşqlərdən başqa, nəzəri məşğələlərimiz də olur. Fiziki hazırlığımız yaxşıdır. Çalışırıq ki, yeni ildə doğma meydanda keçirəcəyimiz ilk oyunları qələbə ilə başa vuraq. Düzdür, yoldaşlıq oyunları komandanı rəsmi matçlara hazırlamaq üçündür. Ona görə bəzən nəticə ikinci plana keçir, əsas baş məşqçinin nə istədiyini meydanda ona qaytarmağa çalışırsan", - deyə futzalçı bildirib.
O, Danimarka millisinin son illərdə inkişafda olduğunu söyləyib: "Düzdür, onlar reytinqdə bizdən geridə olduğuna görə, DÇ-2028-in ilkin mərhələsindən mübarizəyə başlayacaqlar. Rəqibin oyununu izləmişik. Baş məşqçimiz analiz edib, videoları göstərib. Zəif tərəflərini deyib, ondan necə istifadə etməli olduğumuzu da məşqlərdə göstərir, üzərində işləyirik. Çətin oyun olacaq, ancaq istənilən halda azarkeşlərimizi sevindirmək üçün əlimizdən gələni edəcəyik”.
