“ABŞ Prezidenti Donald Trampın Davosda keçirilən Dünya İqtisadi Forumundakı çıxışından əvvəl Avropada narahatlıq artır.
Bir neçə Avropa hökuməti Trampın öz rəhbərliyi altında Birləşmiş Millətlər Təşkilatına alternativ olan yeni bir beynəlxalq qurumun yaradılacağını elan edə biləcəyindən qorxur”.
“Cebheinfo.az” xəbər verir ki, bu barədə “Bild” yazır.
Nəşr Trampın Qəzza planının bir hissəsi olaraq elan etdiyi "Sülh Şurası" adlanan qurumdan bəhs edir:
“Əvvəlcə bu qurum Qəzza zolağındakı vəziyyəti izləməli idi, lakin sızdırılan nizamnamədə bu mövzu demək olar ki, yoxa çıxıb. Bunun əvəzinə daha geniş bir məqsəd ortaya çıxıb:
münaqişədən təsirlənən və ya təhdid edilən bölgələrdə sülhün təmin edilməsi”.
İddia olunur ki, Tramp şuraya təkbaşına sədrlik etmək və hətta öz varisini seçmək hüququna malik olacaq.
Dəvət olunanların siyahısı Avropada narahatlıqları artırır. Dəvəti Almaniya, Fransa, Ukrayna, Çin və Rusiyadan və digər ölkələr alıb. Argentina, Macarıstan, Albaniya, Belarus və İsrail artıq razılıq veriblər:
“Aİ mənbələri bildirib ki, onlar iştirakdan imtinanın Trampın qəzəbinə və yeni sanksiyalara səbəb ola biləcəyindən, ABŞ, Çin və Rusiya avropalılar olmadan danışıqlara başlasalar, iştirakın təsir itkisinə səbəb ola biləcəyindən qorxurlar”.
Xatırladaq ki, dəvət olunanlar arasında Azərbaycan da var.
