Doğum prosesi bir çox qadın üçün həm həyəcanverici, həm də qorxulu ola bilər.
Pravda.az bildirir ki, doğumla bağlı müəyyən səviyyədə narahatlıq normaldır. Lakin bu qorxu həddindən artıq olduqda qadının psixoloji vəziyyətinə mənfi təsir göstərə, hətta hamilə qalmaqdan çəkinməsinə səbəb ola bilər. Bu hal tibbdə “tokofobi” adlanır.
Araşdırmalara görə, doğum qorxusunun əsas səbəbləri arasında ağrı qorxusu, əvvəlki travmatik doğum təcrübələri, yanlış və ya qeyri-kafi məlumat, həmçinin psixoloji və sosial dəstəyin olmaması yer alır. Tokofobi həm ilk dəfə ana olmağa hazırlaşan qadınlarda, həm də əvvəl doğum etmiş qadınlarda müşahidə oluna bilər.
Mütəxəssislər doğum qorxusunun aradan qaldırılması üçün hamiləlik dövründə həkim və ya mama ilə açıq ünsiyyət qurmağı, doğum prosesi ilə bağlı düzgün və etibarlı məlumat əldə etməyi tövsiyə edirlər. Bundan əlavə, doğumun baş tutacağı mühiti əvvəlcədən görmək, relaksasiya texnikalarından istifadə etmək, meditasiya və yüngül fiziki məşqlərlə məşğul olmaq qorxunun azalmasına kömək edə bilər.
Ciddi doğum qorxusu yaşayan qadınlar üçün isə psixoloji dəstək xüsusi əhəmiyyət daşıyır. Koqnitiv-davranışçı terapiya, eləcə də travma sonrası stres pozuntularında tətbiq edilən EMDR terapiyasının bu sahədə effektiv olduğu qeyd olunur.
Mütəxəssislər vurğulayırlar ki, doğum qorxusu gizlədilməməli, vaxtında dəstək alınmalı və hamiləlik prosesi həm fiziki, həm də psixoloji baxımdan sağlam şəkildə idarə olunmalıdır.
Əminə Bayramova
