Siqaret çəkən böyüklərin əksəriyyəti tütün istifadəsinə yeniyetməlik dövründə başlayır.
Pravda.az bildirir ki, siqaret istifadəçilərinin təxminən 90 faizi 19 yaşından əvvəl bu vərdişlə tanış olur. Bu səbəbdən uşaqlarda və yeniyetmələrdə siqaret istifadəsi ciddi ictimai sağlamlıq problemi kimi qiymətləndirilir.
Ekspertlərin sözlərinə görə, valideynlər övladlarının siqaret çəkdiyini aşkar etdikdə aqressiv və cəzalandırıcı yanaşmadan uzaq durmalıdırlar. Uşağa qışqırmaq və ya onu təhdid etmək problemi daha da dərinləşdirə bilər. Bunun əvəzinə sakit, anlayışlı və dəstəkləyici ünsiyyət qurmaq daha effektiv hesab olunur.
Mütəxəssislər valideynlərə uşaqlara siqaretin zərərlərini yalnız xəstəlik riski ilə deyil, gündəlik həyata təsirləri ilə də izah etməyi tövsiyə edirlər. Siqaretin pis nəfəs qoxusu, dişlərin saralması, dərinin vaxtından əvvəl qocalması, idman performansının zəifləməsi və maddi itkilərə səbəb olması kimi təsirləri yeniyetmələr üçün daha anlaşılan ola bilər.
Bundan əlavə, uşağın siqaretə niyə başladığını anlamaq, açıq dialoq qurmaq və onu siqareti tərgitməyə təşviq etmək vacib sayılır. Valideynlərin evdə və ətraf mühitdə siqaret istifadəsinə yol verməməsi, eyni zamanda öz davranışları ilə sağlam nümunə göstərməsi də mühüm amil kimi qeyd olunur.
Mütəxəssislər vurğulayırlar ki, siqaretlə mübarizədə ailə dəstəyi əsas rol oynayır. Zərurət olduqda psixoloq və ya mütəxəssis həkimə müraciət etmək uşağın bu vərdişdən uzaqlaşmasına müsbət təsir göstərə bilər.
Əminə Bayramova
