"Avropa İttifaqının sammit iştirakçıları Arktikada hərbi əməliyyatlara yararlı silah və texnika, o cümlədən buzqıran gəmilərin alınmasına başlamağı qərara alıblar".
Publika.az xəbər verir ki, bu barədə Avropa Komissiyasının sədri Ursula fon der Lyayen bildirib. Onun açıqlaması Avropa Komissiyasının saytında yerləşdirilib.
O qeyd edib ki, Avropa İttifaqı uzun illər ərzində Arktikanın təhlükəsizliyinə kifayət qədər investisiya qoymayıb və bu, Avropa müdafiə fondlarından istifadə etməklə düzəldiləcək.
“Biz Arktikaya uyğun silah və texnika, o cümlədən buzqıranlar alacağıq”, – deyə Avropa Komissiyasının sədri əlavə edib.
Daha əvvəl Fon der Lyayen Avropa İttifaqının bu il öz təhlükəsizlik strategiyasını qəbul edəcəyini və bunun tərkibinə Arktika üzrə yeni strategiyanın da daxil ediləcəyini bildirmişdi. O, vurğulayıb ki, Avropa İttifaqının təhlükəsizlik strategiyasının əsas prinsipinə görə suveren xalqlar öz gələcəyini özləri müəyyən etməlidir.
