ABŞ prezidenti Donald Tramp Kanadanın Baş naziri Mark Karniyə “Sülh Şurası”na qoşulmaq üçün göndərilən dəvəti geri götürüb. “Reuters” yazır ki, bu qərar cənab Karninin Dünya İqtisadi Forumu çərçivəsində Davosda çıxışından sonra qəbul edilib. Həmin çıxışda Baş nazir ABŞ-nindigər ölkələrə qarşı iqtisadi təzyiq alətlərindən istifadə etməsini tənqid edib.
Buna cavab olaraq Donald Tramp “Truth Social” sosial şəbəkəsində Mark Karniyə ünvanlanmış mesaj paylaşıb. Mesajda o bildirib ki, Kanada “indiyədək yaradılmış ən nüfuzlu Liderlər Şurası”na qoşula bilməyəcək.
“Sülh Şurası” ilkin olaraq Qəzza sektorunda sülh şərtlərinə əməl olunmasına nəzarət məqsədilə hazırlanıb. Təşəbbüs “United Nations Security Council”un qətnaməsi ilə təsdiqlənib. Sonradan Donald Tramp təşkilatın səlahiyyətlərinin genişləndirildiyini və dünyanın digər bölgələrindəki münaqişələrin də həlli ilə məşğul olacağını elan edib. Təşkilata qoşulmaq üçün 58 ölkə, o cümlədən Rusiya dəvət alıb. ABŞ-nin müttəfiqləri olan Böyük Britaniya, Fransa və İtaliya hələlik qoşulmayacaqlarını bəyan ediblər.
