"Appro Hospital"da ürəyinə stent qoyulan xəstə dünyasını dəyişib.
56 yaşlı Cəmil Qafarovun ailəsi onun ölümünə həkim məsuliyyətsizliyinin səbəb olduğunu iddia edir.
Xezerxeber.az xəbər verir ki, mərhumun həyat yoldaşı Zahirə Qafarovanın sözlərinə görə, 56 yaşlı Cəmil Qafarovun səhhəti yanvarın 15-də evdə qəflətən pisləşib. O bildirir ki, Cəmil Qafarova ilk yardımı təcili tibbi yardım xidmətinin əməkdaşları edib. Bundan sonra o, qismən də olsa özünü yaxşı hiss edib. Bir neçə saat sonra ailə üzvləri Cəmil Qafarovun yenidən özünü narahat hiss etdiyini görüb "Appro Hospital"aparıblar.
Mərhumun həyat yoldaşı iddia edir ki, birinci əməliyyatdan sonra Cəmil Qafarov özünü yaxşı hiss edib və palataya köçürülüb. İki gün sonra kordioloq cərrah Rafiq Xəlilov ailəyə məlumat verib ki, xəstəyə ikinci stendin qoyulması üçün təcili əməliyyat lazımdır. Əməliyyatdan sonra isə onun vəziyyəti ağırlaşıb. Ailə onu da iddia edir ki, ölüm halı ilə bağlı ailəyə çox gec məlumat verilib.
Kardioloq-cərrah Rafiq Xəlilov isə mərhum Cəmil Qafarovun ürəyin kəskin koronar sindromu diaqnozu ilə hospitalizasiya olunduğunu bildirdi.
"Appro Hospital"dan bildirildi ki, ölümün dəqiq səbəbləri məhkəmə tibbi ekpertiza tərəfindən araşdırılır.
Xezerxeber.az mövzu ilə bağlı daha ətraflı videomaterialı təqdim edir.
