“Çelsi”nin hücumçu yarımmüdafiəçisi Koul Palmer komandanın toxunulmaz oyunçularından biridir və buna görə də London klubu onu “Mançester Yunayted”ə satmaq niyyətində deyil.
İdman.Biz bu barədə “The Telegraph”a istinadən məlumat verir.
Mənbəyə görə, hazırda “Çelsi”nin toxunulmaz oyunçular qrupunda Palmerdən başqa kimin olduğu məlum deyil. London klubu komanda daxilində iyerarxiya yaratmaqdan yayınmağa çalışır. Bu səbəbdən “göylər”in bu qrupun tərkibini rəsmi olaraq açıqlaması ehtimalı azdır.
Daha əvvəl mediada 23 yaşlı yarımmüdafiəçinin Mançesterə qayıtmaq istədiyi bildirilirdi.
Palmer 2023-cü ildən “Çelsi”də çıxış edir. Bu mövsüm yarımmüdafiəçi bütün yarışlarda 13 oyunda meydana çıxıb və beş qol vurub. Onun klubla hazırkı müqaviləsi 2033-cü ilin yayına qədərdir. Transfermarkt portalında verilən məlumata görə, futbolçunun bazar dəyəri 120 milyon avrodur.
