Araşdırma hakimiyyətin dinc əhaliyə qarşı planlı və sistemli kütləvi qırğın həyata keçirdiyini ortaya qoyur...
Poliqon xəbər verir ki, Iran International nəşrinin apardığı genişmiqyaslı araşdırmaya əsasən, İran hakimiyyətinin kütləvi etiraz aksiyalarına qarşı repressiyaları müasir tarixdə misli görünməmiş miqyas alıb. Yeni sənədlər, tibb işçilərinin ifadələri, hadisə şahidlərinin açıqlamaları və həlak olanların ailələrindən toplanan məlumatlar göstərir ki, etirazların yatırılması zamanı azı 36 500 nəfər həyatını itirib. Bu rəqəm indiyədək açıqlanan rəsmi və qeyri-rəsmi göstəricilərdən xeyli yüksəkdir.
Araşdırma müəllifləri bildirir ki, baş verənlər ayrı-ayrı insidentlər və ya nəzarətdən çıxmış toqquşmalar deyil, mülki əhalinin məqsədli şəkildə məhv edilməsinə yönəlmiş öncədən planlaşdırılmış və sistemli əməliyyat olub. Materiallarda qeyd olunur ki, təhlükəsizlik qüvvələri bir çox hallarda yaralı etirazçılara belə atəş açıb, hətta xəstəxanalarda müalicə alan şəxslər hədəfə çevrilib. Şahid ifadələrinə görə, bəzi hallarda məhkəmə qərarı olmadan, birbaşa yerindəcə ölüm əmrləri verilib.
Araşdırmada yer alan tibb işçilərinin etirafları və videokadrlar göstərir ki, yaralılar həkimlərin nəzarəti altında olduqları halda belə, stasionarlarda ölümcül güllə yaraları alıblar. Bu faktlar İran hakimiyyətinin səhiyyə müəssisələrinin toxunulmazlığını da kobud şəkildə pozduğunu ortaya qoyur.
Həlak olanların hekayələri isə faciənin miqyasını daha aydın göstərir. Zəncanda güllələnərək öldürülən gənc idmançı və karateçi Arşiya Bararinin taleyi ölkənin müxtəlif bölgələrində baş verən zorakılığın simvoluna çevrilib. Oxşar onlarla, yüzlərlə hadisə İranın şəhər və qəsəbələrində qeydə alınıb.
Araşdırmada həmçinin vurğulanır ki, etirazlar zamanı internetin kütləvi şəkildə bloklanması, məlumatların yayılmasına qoyulan məhdudiyyətlər və hakimiyyətin baş verənləri gizlətmək cəhdləri real mənzərəni uzun müddət beynəlxalq ictimaiyyətdən uzaq saxlayıb. Buna baxmayaraq, beynəlxalq insan haqları təşkilatları artıq ciddi siqnallar aldığını bildirir, hüquq müdafiəçiləri isə sübutların sənədləşdirilməsi və müstəqil beynəlxalq istintaqın aparılmasına çağırırlar.
Poliqon.info
