BAKI, 26 yanvar. TELEQRAF
Yaponiyanın baş naziri Sanae Takaçinin rəhbərlik etdiyi hökumətin reytinqi dekabr ayı ilə müqayisədə kəskin azalaraq 67 faizə enib.
Teleqraf xəbər verir ki, bu barədə "Reuters" "Nikkei" qəzeti və "TV Tokyo" tərəfindən keçirilən sorğuya istinadən məlumat yayıb. Sorğu yanvarın 26-dək olan üç gün ərzində aparılıb.
Məlumata görə, bu, Sanae Takaichi oktyabr ayında baş nazir vəzifəsinə başladıqdan sonra hökumətin dəstək səviyyəsinin ilk dəfə 70 faizdən aşağı düşməsi olub. Eyni zamanda hökuməti dəstəkləmədiyini bildirənlərin payı 18 faizdən 26 faizə yüksəlib.
Sorğuda iştirak edənlərin 56 faizi Takaçinin artan yaşayış xərclərinin təsirini azaltmaq məqsədi daşıyan stimullaşdırıcı paketinin effektiv olacağına inanmadığını bildirib. Bu göstərici paketin müsbət nəticə verəcəyini düşünən 38 faizdən xeyli yüksəkdir.
Qeyd edək ki, Sanae Takaçi fevralın 8-nə növbədənkənar ümumi seçkilər təyin edib. Məqsəd genişləndirici fiskal siyasət üçün ictimai mandat almaqdır. Bu qərar bazarlarda narahatlıq yaradıb və Yaponiyada əlavə borclanma ehtimalı fonunda dövlət istiqrazlarının gəlirliliyinin artmasına səbəb olub.
