Texniki nasazlıq nəticəsində baş verən qəzada onlarla insan itkin düşüb...
Poliqon xəbər verir ki, Filippinlərdə yük-sərnişin bərəsinin qəzaya uğraması nəticəsində həlak olanların sayı 15 nəfərə çatıb, təxminən 100 nəfər isə itkin düşmüş hesab olunur. Bu barədə GMA News telekanalı məlumat yayıb.
Basilan əyalətinin qubernatoru Mudjiva Xatamana bildirib ki, aparılan axtarış-xilasetmə əməliyyatları zamanı indiyədək 317 nəfər xilas edilib. Onun sözlərinə görə, hadisə yerində axtarış işləri davam etdirilir və sağ qalanların tapılması üçün bütün imkanlar səfərbər olunub.
Filippin Sahil Mühafizəsinin açıqlamasına əsasən, qəzanın başlıca səbəbi bərənin göyərtəsində yaranan texniki nasazlıq olub. Hadisə zamanı gəmidə çoxlu sayda sərnişin və yükün olduğu bildirilir. Rəsmi qurumlar baş verənlərlə bağlı araşdırmanı davam etdirir və təhlükəsizlik qaydalarına əməl olunmasının vacibliyini vurğulayırlar.
Xatırladaq ki, 2025-ci ilin iyul ayının əvvəlində İndoneziyanın Bali adası yaxınlığında da bərə batmışdı. Həmin hadisə zamanı azı 61 nəfər itkin düşmüşdü. Xilasedicilərin məlumatına görə, gəmi Yava adasından istirahət zonasına doğru hərəkət edərkən batmış, göyərtəsində 53 sərnişin, 12 ekipaj üzvü və 22 avtomobil, o cümlədən 14 yük maşını olub.
Poliqon.info
