Suriya ordusunun həyata keçirdiyi əməliyyat nəticəsində YPG terror təşkilatından azad edilən Rakka əyalətinin Tabqa şəhərində terrorçular tərəfindən qazılmış kilometrlərlə uzunluqda yeraltı tunel şəbəkəsi aşkarlanıb.
Vətəninfo.az xəbər verir ki, YPG 2017-ci ildən etibarən Fərat çayının sahilində yerləşən Tabqa şəhərini işğal altında saxlayıb. Suriya ordusu yanvarın 18-də keçirdiyi əməliyyatla şəhəri terrorçulardan təmizləyib.
Əməliyyatdan sonra aparılan araşdırmalar zamanı məlum olub ki, YPG terrorçuları kilsə, xəstəxana, bələdiyyə binaları və digər mülki obyektlərin altında geniş tunel sistemi yaradıb. Tunellərin bir hissəsinin girişləri şəhər yollarından da aydın şəkildə görünür.
Səkkiz ildən artıq işğal altında qalan Tabqa şəhəri ciddi infrastruktur problemləri ilə üz-üzə qalıb. Şəhərdə YPG-yə aid şüarlar və divar rəsmləri hələ də qalmaqdadır.
Suriya ordusu şəhərdə təhlükəsizliyə tam nəzarət edib. Partlayıcı maddələrin zərərsizləşdirilməsi üzrə qruplar tunel şəbəkəsini sənədləşdirərək görüntülər əldə ediblər.
Fərat çayı sahilində bombardman edilmiş bir binanın altından tunelə giriş müəyyən edilib. Yeraltı keçidlərdə raket qurğularına aid başlıqlar, yüksək kalibrli mərmi gilizləri aşkarlanıb. Əsgərlərin bildirdiyinə görə, tunellər müxtəlif çıxışlar vasitəsilə şəhərin fərqli nöqtələrinə aparır.
Elektrik sistemi ilə təmin olunmuş tunel şəbəkəsinin bir hissəsi yaşayış sahəsi və “əməliyyat otağı” kimi istifadə olunub. Burada mətbəx, vanna otağı və yataqxanalar olduğu müəyyən edilib. Tuneldə YPG-nin hücumlarda istifadə etdiyi pilotsuz uçuş aparatlarına aid hissələr də tapılıb. Yataqxanalardan birində PKK terror təşkilatının lideri Abdullah Öcalanın şəkli aşkar edilib.
Suriya əsgərlərinin məlumatına görə, tunel şəbəkəsində minaatanlar, raketatanlar və snayperlər üçün mövqelər yaradılıb. Tunellərdən biri hətta şəhərdəki xəstəxanaya qədər uzanır.
Bundan əlavə, YPG terrorçularının 2014-cü ildə İŞİD tərəfindən partladılmış kilsənin altından da tunel qazdığı müəyyən edilib. Kilsənin dağıdılmış skeleti və üzərindəki xaç hələ də qalır. Aşağı mərtəbəyə enildikdə isə terror təşkilatının qazdığı tunelin girişi görünür.
Kilsənin altındakı tunelin də şəhərdəki digər yeraltı şəbəkələrlə əlaqəli olduğu bildirilib. Burada pilotsuz uçuş aparatları ilə idarə olunan bombalar, minaatan mərmiləri və əl istehsalı partlayıcı qurğuların saxlandığı anbar tipli sahə aşkarlanıb.
Suriya ordusunun məlumatına görə, YPG terrorçuları geri çəkilərkən həm tunellərdə, həm də şəhər ətrafında müxtəlif nöqtələrdə partlayıcı maddələr yerləşdiriblər. Hazırda onların təmizlənməsi istiqamətində əməliyyatlar davam edir, lakin tunel şəbəkəsinin bəzi hissələrinə hələ də daxil olmaq mümkün olmayıb.
Əsgərlərin qiymətləndirməsinə görə, YPG Tabqa şəhərindən qeyri-mütəşəkkil şəkildə qaçıb və ərazini tam şəkildə minalamağa vaxt tapmayıb.
