Fövqəladə Hallar Nazirliyinin “112” qaynar telefon xəttinə paytaxtın Nərimanov rayonu, Əhməd Rəcəbli küçəsində yerləşən obyektdə yanğın baş verməsi barədə məlumat daxil olub.
APA xəbər verir ki, bu barədə FHN məlumat yayıb.
Məlumatla əlaqədar dərhal FHN-in Dövlət Yanğından Mühafizə və Xüsusi Riskli Xilasetmə xidmətlərinin qüvvələri əraziyə cəlb olunub.
Hadisə yerində əməliyyat şəraitinin qiymətləndirilməsi zamanı ümumi sahəsi 560kv.m. olan istilik sistemləri satışı ilə məşğul olan dördmərtəbəli obyektin mansard hissəsində yanğın baş verdiyi və havanın küləkli olması səbəbindən yayılma riskinin yüksək olduğu müəyyən edilib.
Yanğınsöndürənlər tərəfindən həyata keçirilmiş zəruri və təxirəsalınmaz tədbirlər sayəsində yanğın genişlənməsinə, o cümlədən digər mərtəbələrə və bitişik yerləşən obyektlərə keçməsinə imkan verilmədən qısa müddətdə söndürülüb.
Yanğın nəticəsində obyektin mansardının yanar konstruksiyaları və rəflərə yığılmış santexnika malları 80kv.m. sahədə yanıb.
Obyektin böyük hissəsi və bitişik obyektlər yanğından mühafizə olunub.
Xəsarət alan olmayıb.
***
04:08
Paytaxtın Nərimanov rayonunda yanğın hadisəsi qeydə alınıb.
APA xəbər verir ki, yanğın Əhməd Rəcəbli küçəsi 210 ünvanında yerləşən obyektlərdən birində baş verib.
Hadisə yerinə Fövqəladə Hallar Nazirliyinin dörd yanğınsöndürən avtomobili və xeyli sayda canlı qüvvəsi cəlb olunub.
Yanğın qısa müddətdə söndürülüb və alovun yaxınlıqdakı tikililərə keçməsinin qarşısı alınıb. Yanğının başvermə səbəbləri araşdırılır.
