Hindistan və Avropa İttifaqı (Aİ) sərbəst ticarət üzrə “tarixi ticarət sazişi” imzalayıb. Sazişin məqsədi ölkələrin ABŞ və Çin asılılığını azaltmaqdır, bu barədə 27 yanvar tarixində Reuters agentliyi Hindistanın Baş Naziri Narendra Modinin açıqlamasına istinadla xəbər yayıb.
Baş Nazir Modinin sözlərinə görə:
“Dünən Hindistan ilə Avropa İttifaqı arasında böyük bir saziş imzalandı. Bütün dünya bunu ‘bütün sazişlərin anası’ adlandırır. Bu saziş 1,4 milyard hindistanlı və milyonlarla avropalı üçün böyük imkanlar açacaq”.
Hindistan və Aİ arasında sərbəst ticarət sazişi üzrə danışıqlar fasilələrlə təxminən 20 il davam edib. Saziş, Aİ-nin cənubi Amerika bloku Mercosur ilə oxşar bir sənəd imzalamasından bir neçə gün sonra yekunlaşdırılıb.
Məqalədə qeyd olunur ki, 2025 maliyyə ilində Hindistan ilə Aİ arasındakı ticarət həcmi 136,5 milyard dollar təşkil edib.
Rəsmi imzalanma isə hüquqi yoxlamadan sonra baş tutacaq və bu proses 5–6 ay davam edə bilər. Məqalə müəllifi hesab edir ki, belə bir saziş ölkələrin həm ABŞ və Prezident Donald Tramp, həm də Çinlə münasibətlərdə daha müstəqil mövqe tutmaq istəyini göstərir.
