ABŞ kəşfiyyatı ABŞ prezidenti Donald Trampa İran hökumətinin zəiflədiyini göstərən bir hesabat təqdim edib.
HİT.az xəbər verir ki, bu barədə "The New York Times" (NYT) mənbələrə istinadən məlumat yayıb.
Məqalədə deyilir: "Bu hesabatlar İran hökumətinin hakimiyyətinin 1979-cu il inqilabı zamanı şahın devrilməsindən bəri ən zəif nöqtədə olduğunu göstərir".
Dekabrın sonlarında başlayan etirazlar, xüsusən də rəsmilərin İranın Ali Lideri Ayətullah Əli Xameneiyə dəstək verən dayaq nöqtələri olduğuna inandığı bölgələrdə İran hökumətinin bəzi üzvlərini sarsıdıb. Etirazlar sakitləşsə də, hökumət çətin vəziyyətdə qalır. NYT-nin məlumatına görə, kəşfiyyat hesabatları dəfələrlə etirazlara əlavə olaraq İran iqtisadiyyatının tarixən zəif vəziyyətdə olduğunu göstərib.
Bu məqamda ABŞ-ın "Abraham Lincoln" təyyarədaşıyan gəmisi "Tomahawk" raketləri ilə təchiz olunmuş üç hərbi gəminin müşayiəti ilə qərbi Hind okeanında ABŞ Mərkəzi Komandanlığının məsuliyyət zonasına daxil olub. ABŞ həmçinin zərbə qüvvələrini gücləndirmək üçün bölgəyə F-15E hücum təyyarələri və İranın qısa və orta mənzilli raketlərinin cavab zərbələrindən qorunmaq üçün əlavə "Patriot" və "THAAD" hava hücumundan müdafiə sistemləri yerləşdirib.
Nəşrin məlumatına görə, ABŞ rəsmiləri regional tərəfdaşlarla İranla bağlı məsləhətləşmələr aparıblar. ABŞ rəsmisinin sözlərinə görə, İsrail rəsmiləri ilə müzakirələrə və Bağdadda keçirilən görüşlərə əlavə olaraq, Tramp administrasiyasının nümayəndələri Səudiyyə Ərəbistanı və Qətər rəsmiləri ilə danışıqlar aparıblar.
Samir
