Kişineu, 27 yanvar, AZƏRTAC
Mən Moldova Respublikasının Avropa yoluna tam sadiqəm və ümid edirəm ki, Aİ üzv dövlətləri də genişlənmə prosesinə sadiq qalacaqlar. Bu, bizim üçün son dərəcə vacib bir mövzudur.
AZƏRTAC Moldpress-ə istinadla xəbər verir ki, bunu Moldova Prezidenti Maya Sandu Avropa Şurası Parlament Assambleyasının (AŞPA) sessiyasında Moldovanın Rumıniya ilə birləşmə məsələsinə mümkün referenduma dair sualları cavablandırarkən bildirib.
Maya Sandu Moldova hakimiyyətinin ölkənin Avropa kursuna qəti sadiqliyini bir daha təsdiqləyib və Avropa Birliyinin genişlənmə siyasətində ardıcıl qalacağına ümid etdiyini deyib.
Maya Sandu Avropa inteqrasiya prosesinin ləyaqətə əsaslandığını vurğulayaraq, həm Moldovanın, həm də Ukraynanın üzvlük danışıqlarının rəsmi olaraq başlanması üçün lazımi şərtləri yerinə yetirdiyini qeyd edib.
“Bu danışıqlar hələ rəsmi olaraq başlamasa da, biz bu istiqamətdə işləməyə davam edirik. Bu prosesin meritokratik təbiətini nəzərə alaraq, Avropa İttifaqı və onun qurumlarından Avropa kursumuzu davam etdirmək üçün aydın və ədalətli bir həll yolu təqdim etmələrini gözləyirik", - deyə Maya Sandu bildirib.
Emil Hüseynli
AZƏRTAC-ın xüsusi müxbiri
Kişineu
