Paris rəqəmsal suverenliyi gücləndirir və məmurlar üçün yeni qaydalar müəyyənləşdirir...
Poliqon xəbər verir ki, Politico nəşrinin məlumatına görə, Fransa hökuməti dövlət qulluqçularının ABŞ-a məxsus videokonfrans xidmətlərindən istifadə etməsini qadağan etməyə hazırlaşır. Söhbət Zoom, Microsoft Teams və Google Meet kimi geniş yayılmış platformalardan gedir.
Qərar dövlət orqanlarının fəaliyyətinin mərhələli şəkildə milli texnoloji həllərə keçirilməsi strategiyasının tərkib hissəsidir. Bu addım Avropada ABŞ-nin rəqəmsal xidmətlərindən dərin asılılıqla bağlı artan narahatlıqlar fonunda atılır. Paris hesab edir ki, dövlət strukturlarının fəaliyyəti üçün istifadə olunan əsas rəqəmsal infrastruktur milli nəzarət altında olmalı və xarici texnoloji risklərdən maksimum dərəcədə qorunmalıdır.
Məlumata görə, Fransanın baş nazirinin kanselyariyası müvafiq sərəncam layihəsi hazırlayıb. Sənəd dövlət məmurlarını videobağlantılar üçün Visio platformasından istifadə etməyə məcbur edir. Visio Fransa Rəqəmsal Texnologiyalar üzrə Nazirlərarası İdarəsi tərəfindən hazırlanmış milli videokonfrans sistemidir və dövlət qurumlarının daxili ehtiyacları üçün nəzərdə tutulub.
Politico yazır ki, Fransa bu qərarla həm məlumatların təhlükəsizliyini artırmağı, həm də strateji texnoloji müstəqilliyini möhkəmləndirməyi hədəfləyir. Analitiklərin fikrincə, bu addım gələcəkdə digər Avropa ölkələri üçün də presedent yarada və Aİ daxilində rəqəmsal suverenlik müzakirələrini daha da sürətləndirə bilər.
Poliqon.info
